खोलामा आएको बाढीको भेलमा फसेका पुजारीसहित ३ जनाको सशस्त्र प्रहरीद्वारा सकुशल उद्धार

काठमाडौं  । लगातारको वर्षापछि खोलामा आएको बाढीका कारण खोलाको बीचमा रहेको मन्दिरमा बाढीको भेलमा फसेका तीन जनाको सशस्त्र प्रहरीले सकुशल उद्धार गरेको छ।

कास्कीको अन्नपूर्ण गाउँपालिका–५ र ६ को सीमामा पर्ने अन्नपूर्ण माताको मन्दिरमा रहेका एक पुजारी र दुई भक्तजनलाई सशस्त्र प्रहरी बल नेपाल नं. २४ कालिका गण कास्कीबाट खटिएको गोताखोरसहितको टोलीले बिहीबार बिहान सकुशल उद्धार गरेको सशस्त्र प्रहरी प्रधान कार्यालयले जनाएको छ।

बाढीले मन्दिरमा आवतजावतका लागि प्रयोग हुँदै आएका दुईवटा फलामे पुल बगाउनुका साथै मन्दिरको केही भागसमेत कटान गरेपछि उनीहरू मन्दिरमै फसेका थिए। लगातारको वर्षा र खोलामा आएको तीव्र बहावका कारण तत्काल उद्धार गर्न कठिन भएको सशस्त्र  प्रहरीले जनाएको छ।

घटनाबारे जानकारी पाएपछि कालिका गणबाट गोताखोरसहितको टोली आज बिहान साढे २ बजे उद्धारका लागि घटनास्थलतर्फ खटिएको थियो। तर, बाढीको बहाव उच्च रहेकाले तत्काल उद्धार सम्भव नभएपछि टोलीले पुनः बिहान रोप रेस्क्यु विधि अपनाएर तीनै जनालाई सुरक्षित स्थानमा ल्याएको सशस्त्र प्रहरी प्रधान कार्यालयले जनाएको छ।

उद्धार गरिएकामा पोखरा महानगरपालिका–१८ साराङकोटका २८ वर्षीय प्रदीप ढकाल, सर्लाही घर भई हाल अन्नपूर्ण गाउँपालिका–८ बस्ने ३० वर्षीय रेवन्तप्रसाद सिंह र भारतका ५२ वर्षीय निर्माण गिरी रहेका भने 

सशस्त्र प्रहरीले जोखिमपूर्ण अवस्थामा रहेका उनीहरूलाई सुरक्षित रूपमा उद्धार गरी थप क्षति हुनबाट जोगाएको सशस्त्र प्रहरीले जनाएको छ।