'आदेशको प्रतीक्षा नगर्नु , जिम्मेवारी बुझेर तत्काल खटिऔँ’ : आईजीपी पौडेल

काठमाडौं । सशस्त्र प्रहरी महानिरीक्षक (आईजीपी) नारायणदत्त पौडेलले विपद्को समयमा आदेशको प्रतीक्षा गरेर नबस्न सशस्त्र प्रहरी कर्मचारीलाई निर्देशन दिएका छन्। उनले आफ्नो जिम्मेवारी र परिस्थितिको गम्भीरता बुझेर तत्काल परिचालित हुन निर्देशन दिएका हुन्।

महानिरीक्षक पौडेलले एक्लो प्रयासबाट मात्रै विपद्को पूर्ण व्यवस्थापन सम्भव नहुने भन्दै प्रभावकारी समन्वय र सहकार्यलाई विपद् व्यवस्थापनको प्रमुख आधारका रूपमा लिनुपर्ने बताए। प्रदेश तथा स्थानीय सरकारसँग आवश्यक समन्वय र सहकार्य गर्दै विपद् व्यवस्थापनमा थप सक्रिय भएर परिचालित हुन उनले निर्देशन दिए।

उनले विपद् व्यवस्थापन, राजमार्ग सुरक्षा, सीमा सुरक्षा, राजस्व चुहावट नियन्त्रणलगायत आन्तरिक सुरक्षाका विभिन्न क्षेत्रमा सशस्त्र प्रहरीले महत्वपूर्ण भूमिका निर्वाह गर्दै आएको उल्लेख गरे। कार्यक्षेत्रमा खटिने राष्ट्रसेवकहरू अझ व्यावसायिक, इमानदार, नैतिकवान् र कर्तव्यनिष्ठ हुँदै परिस्थितिअनुसार तत्काल निर्णय लिन सक्ने हुनुपर्नेमा उनले जोड दिए।

पछिल्लो समय विभिन्न स्थानमा जातीय, धार्मिक तथा साम्प्रदायिक विवादका घटना बढ्दै गएको उल्लेख गर्दै पौडेलले यस्ता परिस्थितिमा परिचालन हुने सशस्त्र प्रहरी कर्मचारीले मानवअधिकारको पूर्ण पालना गर्दै कानुनी दायराभित्र रहेर न्यायोचित रूपमा मात्र बल प्रयोग गर्नुपर्ने बताए। सुरक्षा परिचालन तथा कारबाहीमा संगठनको कुनै कमजोरी नदेखिने गरी जिम्मेवारी पूरा गर्न पनि उनले निर्देशन दिए।

व्यक्तिगत आग्रह–पूर्वाग्रहलाई थाती राखेर नेतृत्वसँग सहकार्य गर्दै संगठन विकासका लागि एउटै लक्ष्यका साथ अघि बढ्न निर्देशन दिँदै पौडेलले ‘म होइन, हामी’ भन्ने भावनाका साथ जिम्मेवारी बोध गरेर काम गरे वृत्तिविकासका अवसरहरू आफैं सिर्जना हुँदै जाने बताए।

सीमावासीसँगको सुमधुर सम्बन्ध सीमा सुरक्षाको महत्वपूर्ण कडी भएको उल्लेख गर्दै उनले सीमावासीको विश्वास, सहयोग र सहभागितालाई सीमा सुरक्षा तथा व्यवस्थापनमा प्रभावकारी रूपमा जोड्नुपर्ने बताए। सीमावासीसँग सशस्त्र प्रहरी कार्यक्रमलाई थप सुदृढ गर्दै अन्य कार्यक्रमसमेत सञ्चालन गर्न उनले निर्देशन दिए।

आपद्–विपद्मा परेका नागरिकको सेवा र सुरक्षामा सशस्त्र प्रहरी बल नेपाललाई भरोसायोग्य संगठनका रूपमा स्थापित गर्नुपर्नेमा जोड दिँदै पौडेलले प्रत्येक कमाण्डरले दण्ड र पुरस्कारको नीतिलाई कडाइका साथ लागू गर्दै कार्यक्षेत्रमा परिचालित हुनुपर्ने बताए।