कैलालीका सीमा नाका अनुगमनमा आईजीपी पौडेल, कमाण्डरलाई प्रभावकारी कार्यसम्पादनको निर्देशन

कैलाली । सशस्त्र प्रहरी महानिरीक्षक (आईजीपी) नारायण दत्त पौडेलले कैलालीस्थित नं. ७ वैद्यनाथ वाहिनी मुख्यालय र नं. ३४ गणको निरीक्षण भ्रमण गरेका छन् ।

निरीक्षणका क्रममा आईजीपी पौडेलले वाहिनी तथा गणबाट भइरहेका कामकारबाही, सुरक्षा व्यवस्थापन र संगठनात्मक गतिविधिबारे जानकारी लिएका थिए । उनले कैलाली जिल्लाका विभिन्न सीमा नाकाको समेत अवलोकन गरी सीमा सुरक्षा अवस्थाबारे जानकारी लिए।

पौडेलले जिल्ला सुरक्षा समिति, भन्सार प्रशासनलगायत सम्बन्धित सरोकारवाला निकायका प्रतिनिधिसँग भेट गरी सीमा सुरक्षा, सीमा अपराध नियन्त्रण, राजस्व चुहावट रोकथाम तथा समसामयिक सुरक्षा विषयमा भइरहेका कामकारबाहीबारे जानकारी समेत लिएका छन्  ।

भेटका क्रममा उनले सीमा सुरक्षालाई थप प्रभावकारी बनाउन सम्बन्धित सबै निकायबीच आवश्यक समन्वय र सहकार्य गर्नुपर्नेमा जोड दिए । सीमा क्षेत्रमा हुने अवैध गतिविधि, चोरी–तस्करी तथा अपराध नियन्त्रणमा प्रभावकारी ढंगले काम गर्न र सूचना आदानप्रदानलाई थप व्यवस्थित बनाउन सम्बन्धित सशस्त्र प्रहरीका कमाण्डरहरुलाई उनले निर्देशन दिएका थिए।

त्यसैगरी, आईजीपी पौडेलले सुदूरपश्चिम प्रदेशअन्तर्गतका नौवटै जिल्लाका विभिन्न तहका कमाण्डर तथा लेखापालहरूलाई प्रभावकारी कार्यसम्पादनका लागि आवश्यक निर्देशन दिएका हुन्  । उनले संगठनको नीति, नियम र निर्देशनको पूर्ण पालना गर्दै जिम्मेवारीप्रति उत्तरदायी भएर कार्यसम्पादन गर्न, उपलब्ध स्रोत–साधनको मितव्ययी तथा प्रभावकारी प्रयोग गर्न र आर्थिक अनुशासन कायम राख्न निर्देशन दिएका थिए।

आईजीपी पौडेलले सीमा सुरक्षा तथा शान्ति सुरक्षाको जिम्मेवारीलाई प्राथमिकतामा राख्दै आफ्नो जिम्मेवारी क्षेत्रमा देखिएका चुनौतीको पहिचान गरी व्यावसायिक, अनुशासित र परिणाममुखी ढंगले कार्यसम्पादन गर्नसमेत निर्देशन दिएको सशस्त्र प्रहरी प्रधान कार्यालयले जनाएको छ।