खोज तथा उद्धारमा १२ सय ५९ सशस्त्र प्रहरीको व्यापक परिचालन, ड्रोनबाट १२ शवको लोकेट: सशस्त्र प्रहरी

काठमाडौँ । रसुवाको भोटेकोशी हुँदै त्रिशूली नदीमा आएको बाढीपछि सशस्त्र प्रहरी बल, नेपालले खोज तथा उद्धार अभियानलाई तीव्रता दिएको छ। बाढी प्रभावित क्षेत्रमा परिचालन भएको सशस्त्र प्रहरीले हालसम्म नदीबाट १५२ वटा शव निकालेको छ भने ७३ जनाको सकुशल उद्धार गरेको जनाएको छ।

बाढीबाट प्रभावित ४८ वटा वडामा सशस्त्र प्रहरीले सूचीकृत गरेका १ हजार २ सय विपद् सूचकमार्फत सूचना संकलन भइरहेको छ। खोज तथा उद्धारका लागि नुवाकोटमा विपद् प्रतिकार्य बेस स्थापना गरी विभिन्न विशेषज्ञता प्राप्त जनशक्तिसहित १ हजार २५९ जना सशस्त्र प्रहरी परिचालन गरिएको जनाएको छ।

सशस्त्र प्रहरीका अनुसार  उद्धार टोलीमा चिकित्सक तथा स्वास्थ्यकर्मी, गोताखोर, तीव्र बहावमा उद्धार गर्न तालिम प्राप्त जनशक्ति, भत्किएका संरचनामा खोज तथा उद्धार गर्ने टोली, शव व्यवस्थापन तथा शिविर व्यवस्थापनका विशेषज्ञलगायत छन्।

हराइरहेकाको खोजीका लागि सशस्त्र प्रहरीको तालिमप्राप्त कुकुरसहितको टोली र पाँच वटा ड्रोन रहेको ड्रोन टोलीसमेत परिचालन गरिएको छ। ड्रोनको सहयोगमा हालसम्म १२ वटा शवको लोकेट गरेर स्थान पहिचान गरिएको सशस्त्र प्रहरीले जनाएको छ।

घाइतेको उपचारका लागि नेपाल एपीएफ अस्पतालमा १०० शय्या छुट्याइएको छ। त्यस्तै, सशस्त्र प्रहरी बलको विपद् व्यवस्थापन तालिम शिक्षालय कुरिनटारमा १०० शय्या क्षमताको विपद् राहत प्रणाली सक्रिय गरिएको छ।

भत्किएका संरचना, जलविद्युत् आयोजनालगायतका स्थानमा सम्पर्कविहीन भएकाहरूको खोजी तथा उद्धार कार्यलाई सशस्त्र प्रहरीको विशेष टोलीले निरन्तरता दिइरहेको जानकारी दिएको छ।