फेवातालमा भारतीय नम्बरको कार खस्दा दुई जनाको मृत्यु, दुई जनाको जीवितै उद्धार

पोखरा । पोखराको फेवातालमा भारतीय नम्बर प्लेटको कार खस्दा दुई जनाको मृत्यु भएको छ भने दुई जनालाई जीवितै उद्धार गरिएको छ।

बिहान करिब ५ बजे पोखरा महानगरपालिका–१८, गैराको चौतारानजिकको घुम्तीबाट लेकसाइडतर्फ आउँदै गरेको बीआर ०५ बीबी ६७५९ नम्बरको कार अनियन्त्रित भएर फेवातालमा खसेको थियो।

कार तालमा खसेलगत्तै सशस्त्र प्रहरी बल, नेपाल नं.२४ गण हेडक्वार्टर कालिका, कास्कीबाट गोताखोरसहितको उद्धार टोली घटनास्थलमा परिचालन भएको थियो। टोलीले तालमा डुबेको कारमा सवार चारै जनाको उद्धार गरेको हो।

उद्धार गरिएका चार जनामध्ये दुई जनालाई सचेत अवस्थामा अस्पताल पठाइएको थियो। तर उपचारका क्रममा उनीहरूको मृत्यु भएको कास्की प्रहरीले जनाएको छ।

मृत्यु हुनेमा भारतको बिहारका २६ वर्षीय नवदीप कुमार यादव र अन्दाजी ४० वर्षीय एक पुरुष रहेका छन्। ती पुरुषको नाम र ठेगाना खुल्न सकेको छैन।

त्यस्तै, २७ वर्षीय अनमोल कुमार यादव र ३३ वर्षीय सुरज यादव जीवितै उद्धार भएका छन्। उनीहरू दुवै भारतको रक्सौलका हुन्। दुवै जनाको पोखरास्थित गण्डकी मेडिकल कलेजमा उपचार भइरहेको र अवस्था खतरामुक्त रहेको प्रहरीले जनाएको छ।