एसपी केसीको निर्देशन: सीमामा सशस्त्र प्रहरीको कडाइ, भुईयाफाँटाबाट १ किलो चरेस र पेस्तोल बरामद

धनगढी । सशस्त्र प्रहरी बल, नेपाल नं. ३४ गण कैलालीका प्रमुख  एसपी खुम केसीको कडा निर्देशनअनुसार सीमा नाकामा निगरानी र आन्तरिक सुरक्षा व्यवस्थालाई थप कडाइ गर्दै अघि बढेको सशस्त्र प्रहरीले ठूलो परिमाणमा चरेससहित एक थान पेस्तोल बरामद गरेको छ।

कैलालीको कैलारी गाउँपालिका–७ स्थित पुरानो भुईयाफाँटाको तीनकुने क्षेत्रमा सशस्त्र प्रहरीले एक थान कटुवा पेस्तोल र करिब एक किलो चरेस बरामद गरेको हो।

बोर्डर आउट पोस्ट भुईयाफाँटाबाट सशस्त्र प्रहरी निरीक्षक रामबहादुर खत्रीको कमाण्डमा खटिएको टोलीले गस्तीका क्रममा गए राति शंकास्पद गतिविधि देखेपछि निगरानी बढाएको थियो। प्रहरी टोलीलाई देखेपछि केही व्यक्ति त्यहाँबाट फरार भएका थिए।

त्यसपछि सशस्त्र प्रहरीले शंकास्पद स्थानमा खोजतलास गर्दा बाटोछेउको झाडीमा कालो प्लास्टिकले बेरेर फालिएको अवस्थामा एक थान कटुवा पेस्तोल र अन्दाजी एक किलो चरेस फेला पारेको जनाएको छ।

बरामद भएका हतियार तथा लागूऔषध आवश्यक अनुसन्धान तथा कानुनी कारबाहीका लागि सम्बन्धित निकायमा बुझाउने प्रक्रिया भइरहेको सशस्त्र प्रहरीले जनाएको छ।

एसपी केसीको निर्देशनपछि कैलालीका सीमा क्षेत्रमा अवैध गतिविधि, लागूऔषध ओसारपसार तथा तस्करी नियन्त्रणका लागि सशस्त्र प्रहरीले निगरानी र गस्तीलाई थप प्रभावकारी बनाउँदै लगेको छ।