नवलपरासीमा सशस्त्र–प्रहरीको अपरेसन: भारतबाट ल्याइएका १ करोड १४ लाख बढीका मोबाइल पार्टस् बरामद, गाडी नियन्त्रणमा

नवलपरासी । पश्चिम नवलपरासीमा सशस्त्र प्रहरी र नेपाल प्रहरीको संयुक्त अपरेसनमा करोडौँ रुपैयाँ मूल्यका अवैध मोबाइल एसेसरिजसहित पिकअप गाडी नियन्त्रणमा लिइएको छ।

सरावल गाउँपालिका–७ स्थित भन्सार टोलमा आज बिहान करिब साढे ४ बजे भारतबाट अवैध रूपमा ल्याएर लु ३ च २९३९ नम्बरको गाडीमा लोड गरिएको अवस्थामा विभिन्न सामान बरामद गरिएको सशस्त्र प्रहरी बल नं. २६ गणले जनाएको छ।

सशस्त्र प्रहरी बल नं. २६ गणका अनुसार सशस्त्र प्रहरीको बीओपी भुजहवा र इलाका प्रहरी कार्यालय महेशपुरबाट खटिएको संयुक्त टोलीले सामानसहित गाडी नियन्त्रणमा लिएको हो।

बरामद सामानमा सेतो रङका १ हजार ७५५ थान एयरपड्स, कालो रङका ५३९ थान एयरपड्स, कालो रङका ३९ हजार ८०० थान टेम्पर ग्लास, सेतो रङका ४ हजार ५०० थान टेम्पर ग्लास र ९३० थान मोबाइल कभर रहेका छन्। त्यसैगरी एक बोरा प्लास्टिकसमेत बरामद भएको सशस्त्र प्रहरी पश्चिम नवलपरासीले जनाएको छ।

सशस्त्र प्रहरीका अनुसार बरामद गरिएका सामानको अन्दाजी मूल्य ९४ लाख ८४ हजार रुपैयाँ रहेको छ। पिकअप गाडीको मूल्य २० लाख रुपैयाँसमेत जोड्दा कुल मूल्य १ करोड १४ लाख ८४ हजार रुपैयाँ रहेको सशस्त्र प्रहरी बल नं.२६ गण नवलपरासीले जनाएको छ।

बरामद गाडी र सामानलाई आवश्यक कारबाहीका लागि भन्सार कार्यालय बुझाउने प्रक्रियाका लागि महेशपुरमा ल्याएर राखिएको सशस्त्र प्रहरीले जनाएको छ।

सीमामा हुने अवैध गतिविधि नियन्त्रणमा सशस्त्र प्रहरी र नेपाल प्रहरीको सक्रियता बढ्दै गएको यो घटनाले देखाएको छ। सीमा सुरक्षा र राजस्व चुहावट नियन्त्रणका लागि खटिएका सुरक्षाकर्मीको सतर्कता र संयुक्त कार्यप्रति स्थानीय स्तरबाट समेत प्रशंसा भएको छ।