जोखिमको पर्वाह नगरी उर्लिएको नदीमा फसेका ३ जनाको सशस्त्र प्रहरीले गर्‍यो सकुशल उद्धार 

कपिलवस्तु । कपिलवस्तुको बाणगंगा नदीमा अचानक पानीको सतह बढेपछि नदीपारि फसेका तीन जनाको सशस्त्र प्रहरीले सकुशल उद्धार गरेको छ ।

शनिबार राति बाणगंगा नगरपालिका–९ कुस्मास्थित बाणगंगा नदीमा पानीको सतह अचानक बढ्दा स्थानीय एक बालकसहित तीन जना नदीपारि फसेका थिए ।

घटनाबारे जानकारी पाएपछि सशस्त्र प्रहरी बल, नेपाल नं.२८ गण हेडक्वार्टर कपिलवस्तुबाट खटिएको टोली घटनास्थलमा पुगेको थियो । टोलीले जोखिमको अवस्थाबीच नदीपारि फसेका तीनै जनालाई सकुशल उद्धार गरेको हो ।

उर्लिएको बाणगंगा नदीबाट उद्धारपछि उनीहरूलाई सुरक्षित स्थानमा पठाइएको सशस्त्र प्रहरीले जनाएको छ ।