रुपन्देहीबाट १० लाखभन्दा बढी मूल्यको अवैध औषधी तथा किराना सामान सशस्त्र प्रहरीको नियन्त्रणमा

रुपन्देही। सशस्त्र प्रहरी बल, नेपालले रुपन्देहीबाट अवैध रूपमा नेपालतर्फ ल्याउँदै गरेको विभिन्न किसिमका औषधी तथा किराना सामग्री बरामद गरेको छ।

आज बिहान सशस्त्र प्रहरी बल, नेपाल सीमा सुरक्षा गुल्म हेडक्वार्टर डण्डाबाट खटिएको टोलीले सिद्धार्थनगर नगरपालिका–१ स्थित बाइपास इलाकामा चेकजाँचका क्रममा उक्त सामान बरामद गरेको सशस्त्र प्रहरी बल नं २७ गण रूपन्देहीले जनाएको छ।

सशस्त्र प्रहरी बल नं २७ गणका अनुसार बरामद सामग्रीको अन्दाजी मूल्य रु. १० लाख १५ हजार ८ सय रहेको छ। अवैध सामग्री ढुवानीमा प्रयोग गरिएको ई–रिक्सा र स्कुटर समेत नियन्त्रणमा लिइएको सशस्त्र प्रहरी रूपन्देहीले जनाएको छ।

बरामद गरिएका सामान तथा सवारीसाधन आवश्यक कारबाहीका लागि सम्बन्धित निकायमा बुझाइएको सशस्त्र प्रहरी बल नं २७ गणले जनाएको छ।