सशस्त्र प्रहरीका कर्मचारीलाई बिदामा पनि उपत्यका नछाड्न निर्देशन

काठमाडौं । सम्भावित बाढी, पहिरोलगायतका विपद् सामना गर्न सशस्त्र प्रहरी बल,नेपालले आफ्ना कर्मचारीलाई तयारी अवस्थामा रहन निर्देशन दिएको छ।

मौसम प्रतिकूल बन्दै गएपछि सशस्त्र प्रहरी प्रधान कार्यालयले काठमाडौं उपत्यकामा कार्यरत कर्मचारीलाई सार्वजनिक बिदाका दिनसमेत उपत्यका बाहिर नजान निर्देशन जारी गरेको हो।

आवश्यकताअनुसार तत्काल परिचालन गर्नुपर्ने अवस्था आउन सक्ने भएकाले बिदामा रहेका कर्मचारीलाई समेत सम्पर्कमा रहन भनिएको छ। विपद्का घटना भए तत्काल उद्धार तथा प्रतिकार्यमा खटाउन सकिने गरी जनशक्ति तयारी अवस्थामा राखिएको सशस्त्र प्रहरीले जनाएको छ।

सशस्त्र प्रहरीका अनुसार पछिल्लो मौसम अवस्था र सम्भावित जोखिमलाई ध्यानमा राखेर कर्मचारीलाई यस्तो निर्देशन दिइएको हो।