रुपन्देहीबाट २ किलो ६०५ ग्राम सुनसहित महिला पक्राउ 

रुपन्देही । रुपन्देहीको सिद्धार्थनगरबाट सशस्त्र प्रहरी र नेपाल प्रहरीको संयुक्त टोलीले ठूलो परिमाणमा सुनका गरगहना बरामद गरेको छ।

विशेष सूचनाका आधारमा असोज १४ गते सिद्धार्थनगर नगरपालिका–१ स्थित शान्तिगेट चेकप्वाइन्टमा गरिएको जाँचका क्रममा एक महिलाको साथबाट उक्त गरगहना फेला परेको सशस्त्र प्रहरीले जनाएको छ।

सशस्त्र प्रहरी बल नेपाल सीमा सुरक्षा गुल्म डण्डा र नेपाल प्रहरीको संयुक्त टोलीले चेकजाँच गर्दा २ किलो ६०५ ग्राम तौलका विभिन्न प्रकारका गरगहना बरामद गरेको जनाएको छ।

बरामद गरगहनाको मूल्य २ करोड ५१ लाख ९३ हजार ३५० रुपैयाँ बराबर रहेको बताइएको छ। गरगहनासहित नियन्त्रणमा लिइएकी महिलालाई आवश्यक अनुसन्धान तथा कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ।