चोरी गरिएको प्राचीन मूर्ति भारत पुर्‍याउन खोज्दा एक युवक सीमामा समातिए

काठमाडौं । नेपालको मन्दिरबाट चोरिएको देवीको प्राचीन मूर्ति भारतमा बेच्न लैजाँदै गरेका एक युवक भारतीय सीमामा पक्राउ परेका छन्।

भारतको जोगबनी नाकामा खटिएका सीमा सुरक्षा बल(एसएसबी)को टोलीले २० वर्षीय सुरज विश्वकर्मालाई नियन्त्रणमा लिएका हुन्। उनको साथबाट करिब ८ देखि ९ किलोग्राम तौलको पित्तलजस्तो धातुबाट बनेको देवीको मूर्ति फेला परेको सशस्त्र प्रहरीले जनाएको छ।

नेपालको सशस्त्र प्रहरी बलले मन्दिरबाट देवीको मूर्ति हराएको र चोरीमा संलग्न व्यक्ति भारततर्फ जान सक्ने जानकारी दिएपछि भारतीय सुरक्षाकर्मीले सीमामा सतर्कता बढाएका थिए। यही क्रममा सीमा स्तम्भ नम्बर १८० नजिकको जाँच बिन्दुमा नेपालबाट भारत छिर्न खोजिरहेका विश्वकर्मामाथि निगरानी गरिएको थियो।

जाँचका क्रममा उनले बोकेको बोराभित्र मूर्ति भेटिएपछि उनलाई पक्राउ गरिएको हो। भारतीय पक्षका अनुसार प्रारम्भिक बयानमा विश्वकर्माले मूर्ति नेपालकै एक मन्दिरबाट चोरेर भारतमा बिक्री गर्ने योजनासहित ल्याएको बताएका छन्।

पक्राउ परेका युवक र बरामद मूर्ति आवश्यक प्रक्रिया पूरा गरी थप अनुसन्धानका लागि नेपालको सशस्त्र प्रहरीलाई बुझाइएको छ। घटनाबारे थप अनुसन्धान हुने जनाइएको छ।