नक्कली शैक्षिक प्रमाणपत्र पेश गरेर नियुक्ति लिएका इन्जिनियरविरुद्द मुद्दा दायर

काठमाडौं  । नक्कली शैक्षिक प्रमाणपत्र पेस गरेर नियुक्ति लिएको भन्दै अख्तियार दुरुपयोग अनुसन्धान आयोगले एक इन्जिनियरविरुद्द मुद्दा दायर गरेको छ।

अख्तियारका अनुसार राष्ट्रिय आवास कम्पनी लिमिटेड पुल्चोकमा करारमा कार्यरत सुमन खनालविरुद्ध मुद्दा दायर गरिएको हो।  खनालले करारमा नियुक्ति लिने प्रयोजनका लागि पेस गरेको ब्याचलर अफ सिभिल इन्जिनियरिङ र नेपाल इन्जिनियरिङ काउन्सिलको शैक्षिक प्रमाणपत्र नक्कली रहेको उजुरीका आधारमा अख्तियारले बिहीबार विशेष अदालतमा मुद्दा दायर गरेको हो ।

खनालले ट्रान्सक्रिप्ट, क्यारेक्टर सर्टिफिकेट, नेपाल इन्जिनियरिङ्ग परिषदको प्रमाण पत्र, इन्जिनिरिङ्गको लाइसेन्स समेतको नक्कली शैक्षिक योग्यता तथा प्रमाणपत्र पेस गरी लाभ र सुविधा लिएको  अख्तियारले जनाएको छ ।

खनालविरुद्ध ६ महिनादेखि एक वर्षसम्म कैद र २० हजार रुपैयाँसम्म बिगो मागदाबी गर्दै अदालतमा मुद्दा दायर गरेको अख्तियारले जानकारी दिएको छ।