नक्कली सर्टिफिकेट काण्ड: अनुसन्धान विभागका प्रमुख अनुसन्धान अधिकृत केसीविरुद्ध मुद्दा

काठमाडौँ । राष्ट्रिय अनुसन्धान विभागका प्रमुख अनुसन्धान अधिकृत ठाकुर प्रसाद केसीविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।केसीले सेवा प्रवेशदेखि विभिन्न तहमा बढुवा पाउँदासम्म नक्कली शैक्षिक प्रमाणपत्र (नक्कली सर्टिफिकेट) प्रयोग गरेको आरोपमा आयोगले बुधबार विशेष अदालत, काठमाडौँमा आरोपपत्र दायर गरेको हो।

सुरक्षा निकायमा कार्यरत कर्मचारीले जागिर तथा बढुवाका क्रममा पेस गरेका शैक्षिक प्रमाणपत्रसम्बन्धी परेको उजुरीमाथि छानबिन गर्ने क्रममा केसीको प्रमाणपत्रसमेत शंकास्पद भेटिएको अख्तियारले जनाएको छ।

आयोगका अनुसार केसीले भारतको उत्तर प्रदेशस्थित माध्यमिक शिक्षा परिषद्बाट जारी भएको हाईस्कुल तहको प्रमाणपत्र नक्कली बनाएर राष्ट्रिय अनुसन्धान विभागमा सहायक निरीक्षक पदमा प्रवेश गरेका थिए। उक्त प्रमाणपत्रलाई नै आधार बनाएर उनले त्यसपछिका बढुवासमेत लिएको अनुसन्धानबाट खुलेको अख्तियारको दाबी छ।

अख्तियारका अनुसार केसी २०६६ सालमा वरिष्ठ अनुसन्धान सहायक, २०७३ सालमा अनुसन्धान अधिकृत र २०८१ सालमा प्रमुख अनुसन्धान अधिकृत पदमा बढुवा भएका थिए। यस क्रममा उनले सरकारी सेवासँग सम्बन्धित तलब, भत्ता तथा अन्य सुविधा लिएको अख्तियारको आरोप छ।

नक्कली शैक्षिक प्रमाणपत्र प्रयोग गरी सरकारी सेवामा प्रवेश गर्नुका साथै त्यसैलाई आधार बनाएर पटक–पटक पदोन्नति लिएको कार्य भ्रष्टाचारसम्बन्धी प्रचलित कानुनविपरीत रहेको आयोगको ठहर छ।अख्तियारले साविक भ्रष्टाचार निवारण ऐन, २०१७ तथा प्रचलित भ्रष्टाचार निवारण ऐन, २०५९ का सम्बन्धित व्यवस्थाअनुसार केसीलाई कैद र जरिवाना हुनुपर्ने मागदाबी गरेको छ।

केसीविरुद्ध साविक ऐनको दफा १२ र दफा २९ को उपदफा (२) तथा प्रचलित ऐनको दफा १६ को उपदफा(१) बमोजिम सजाय माग गर्दै विशेष अदालतमा मुद्दा दायर गरिएको अख्तियार दुरुपयोग अनुसन्धान आयोगले जनाएको छ।