गाउँपालिकाको सडक निर्माणमा भ्रष्टाचार गरेको आरोपमा मुद्दा दायर

काठमाडौँ । अख्तियार दुरुपयोग अनुसन्धान आयोगले मुगु जिल्लाको सोरु गाउँपालिकाको सडक निर्माणमा वास्तविक कामभन्दा बढी मूल्याङ्कन गरी रकम हिनामिना गरेको अभियोगमा तत्कालीन प्रमुख प्रशासकीय अधिकृतसहितका अधिकारीहरू विरुद्ध मुद्दा दायर गरेको छ ।

सोरु गाउँपालिका-१ अन्तर्गत जवलधारा पीसीसी सडक निर्माण योजनाको लागि मुख्यमन्त्री रोजगार कार्यक्रमको अनुदान रकम  ३६ लाख ४० हजार रुपैयाँ प्राप्त भएको थियो । योजना सम्झौता बमोजिम जनश्रमदान  तीन लाख ७३ हजार ४३९ हजार रुपैयाँ गरी सडक निर्माणको कूल लागत र ४० लाख १३ हजार ४३९ रुपैयाँ  तय गरिएको थियो ।

त्यसमा तोकिए बमोजिम काम नगरी बढी काम गरेको देखाएर  सात लाख छ हजार ७९९ रुपैयाँ बराबर भ्रष्टाचार गरेको पाइएको आयोगले जनाएको छ । आयोगले तत्कालीन प्रमुख प्रशासकीय अधिकृत वीरेन्द्र मल्ल, इन्जिनियर प्रकाश आचार्य र सव इन्जिनियर जगतबहादुर मल्ल विरुद्ध  सात लाख छ हजार ७९९ रुपैयाँ  बराबरको बिगो दाबी गर्दै मुद्दा दायर गरेको हो ।

सोरु गाउँपालिकाका लेखापाल जेठबहादुर बुढा र योजना शाखा प्रमुख नवीन बुमी, जवलधारा पीसीसी सडक निर्माण योजनाको श्रम कार्यदल उपभोक्ता समितिका अध्यक्ष चक्रबहादुर छन्त्याल, सहसंयोजक विष्णु छन्त्याल, कोषाध्यक्ष घोसीसरा शाही र सचिव मुकुन्दे दमाई विरुद्ध समान बिगो माग दाबी गरिएको छ।

अनुगमन समितिका संयोजक दलवीर सार्की, सदस्य पुने शाही र वडा नं १ का तत्कालीन वडाध्यक्ष मिसिन्द्र शाही विरुद्ध कैद र जरिवानाको माग दाबी गरिएको आयोगका प्रवक्ता राजेन्द्रकुमार पौडेलले जानकारी दिए। रासस।