'सर्वोच्चबाट भ्रष्टाचारी ठहर भएका कांग्रेस सभापति' आकस्मिक राजीनमा

काठमाडौं । सर्वोच्च अदालतबाट भ्रष्टाचार मुद्दामा दोषी ठहर भएका नेपाली कांग्रेस सर्लाही सभापति सुरेन्द्र प्रसाद सिंहले राजीनामा दिएका छन् । 

जिल्ला सभापति सिंहले पार्टी सभापति शेरबहादुर देउवालाई सम्बोधन गर्दै आज पदबाट राजीनामा दिएका हुन् ।  २०७८ फाल्गुण २९ गतेदेखि सर्लाही सभापति भएका सिंहमाथि दायर भएको भ्रष्टाचार मुद्दामा सर्वोच्च अदालतले दोषी ठहर गरेपछि उनले राजीनामा दिएका हुन् ।

उनको राजीनामा पत्रमा यस्तो भनिएको छ-"पछिल्लो पटक म माथि लगाइएको मुद्दाको सन्दर्भमा सम्मानित अदालतले निर्णय गरेको अवस्था छ । सम्मानित अदालतले गरेको निर्णय मान्ने मेरो कर्तव्य हो, तर उक्त निर्णयले मलाई अन्याय भएको मेरो ठहर छ । म माथि भएको अन्यायको, म व्यक्तिगत रूपमा मेरो कानुनी तथा न्यायिक लडाइ लडिरहनेछु । साथमा मेरो राजनीतिक लडाइ जारी नै रहनेछ । यद्यपि सम्मानित अदालतको निर्णय, नेपालको प्रचलित कानुन र पार्टीको विधान बमोजिम म सभापतिको रूपमा आफ्नो जिम्मेवारीमा निरन्तर रहने अवस्था रहेन।"