नगरपालिकाको सडक ठेक्कामा भ्रष्टाचार: ८ जनामाथि मुद्दा दायर

काठमाडौं । डोल्पाको त्रिपुरासुन्दरी नगरपालिकामा सडक स्तरोन्नति ठेक्का प्रक्रियामा मिलेमतो गरी भ्रष्टाचार गरेको आरोपमा अख्तियार दुरुपयोग अनुसन्धान आयोगले आठ जनाविरुद्ध विशेष अदालत, काठमाडौंमा मुद्दा दायर गरेको छ।

आयोगले उनीहरूविरुद्ध ५५ लाख ८९ हजार ६३ रुपैयाँ ६ पैसाको बिगो कायम गर्दै भ्रष्टाचार निवारण ऐन, २०५९ बमोजिम कैद, जरिवाना र बिगो असुलउपर गर्न माग गरेको हो।

ठेक्कामा मिलेमतो र अनावश्यक शर्त

आयोगका अनुसार, त्रिपुरासुन्दरी नगरपालिकाले आर्थिक वर्ष २०७८-७९ मा वडा नं. ५ स्थित खदाङदेखि ल्हाँसम्मको मोटरबाटो स्तरोन्नतिका लागि बोलपत्र आह्वान गरेको थियो।

सात वटा निर्माण कम्पनी सहभागी भए पनि मूल्यांकन समितिले मिलेमतो गर्दै अनावश्यक शर्तहरू तेर्स्याई छ वटा कम्पनीलाई अयोग्य ठहराएको थियो। त्यसपछि सबैभन्दा न्यूनतम रकम रु. २४ लाख ७३ हजार ६१५ कबोल गर्ने कृष्ण निर्माण सेवालाई अनुत्तीर्ण गराई, सबैभन्दा बढी रकम रु.८० लाख ६२ हजार ६७८ कबोल गर्ने दिव्या निर्माण सेवा प्रा.लि. लाई ठेक्का दिइएको थियो।

कस–कसलाई मुद्दा ? 

मुद्दा दायर गरिएकामध्ये तत्कालीन निमित्त प्रमुख प्रशासकीय अधिकृत लाल प्रसाद पोखरेल, इन्जिनियर कर्ण बहादुर कार्की, प्रशासकीय अधिकृत हिरा चन्द्र धराला, शिक्षा अधिकृत भिम बहादुर थापा, वरिष्ठ लेखा सहायक रुपचन्द्र बुढा, एमआईएस अपरेटर हरिचन्द्र बिष्ट, र मूल्यांकन समितिका सदस्य इन्जिनियर शिशिर कुमार गुरुङ रहेका छन्।

त्यसैगरी, ठेक्का पाउने दिव्या निर्माण सेवा प्रा.लि. डोल्पा र प्रोप्राइटर भिमराज न्यौपानेलाई समेत मतियारका रूपमा प्रतिवादी बनाइएको अख्तियारले जनाएको छ।

राज्यलाई हानि र गैरकानूनी लाभ

आयोगको भनाइमा, न्यूनतम र अधिकतम कबोल रकमबीचको फरक रकम रु.५५ लाख ८९ हजार ६३ रुपैयाँ ६ पैसा राज्यलाई हानि पुर्‍याई गैरकानूनी लाभ लिने उद्देश्यले गरिएको भ्रष्टाचार हो।अख्तियारले सबै प्रतिवादीहरूलाई मुख्य कसुरदार सरह सजाय दिन माग गरेको छ।