नागरिक उड्ययन प्राधिकरणका महानिर्देशक अधिकारी अख्तियारको नियन्त्रणमा

काठमाडौँ । नागरिक उड्ययन प्राधिकरण (क्यान) का महानिर्देशक प्रदीप अधिकारीलाई अख्तियार दुरुपयोग अनुसन्धान आयोगले भ्रष्टाचार आरोपमा पक्राउ गरेको छ ।

आयोगले अधिकारीलाई आज नियन्त्रणमा लिएर विशेष अदालतमा उपस्थित गराएको हो । अख्तियार स्रोतका अनुसार अधिकारीविरुद्ध भ्रष्टाचार मुद्दामा अभियोगपत्र दर्ता गर्ने प्रक्रिया अघि बढाइएको छ । अभियोगपत्रसहित अधिकारीलाई अदालतमा पेस गरिएको आयोगका एक अधिकारीले बताएका छन् ।

यसै प्रकरणमा क्यानका पूर्व महानिर्देशक मुरारी भण्डारीलाई पनि अख्तियारले नियन्त्रणमा लिएको छ । भक्तपुरको नलिन्चोक हेलिकप्टर काण्डसँग सम्बन्धित भ्रष्टाचार मुद्दा दायर गर्ने प्रयोजनका लागि उनीहरूलाई नियन्त्रणमा लिइएको अख्तियार स्रोतले जनाएको छ । स्रोतका अनुसार दुवै जनालाई म्याद थपका लागि विशेष अदालत लगिएको छ ।

यसअघि कात्तिक ३ गते साँझ अधिकारीमाथि ललितपुरको सातदोबाटो क्षेत्रबाट घर फर्किने क्रममा अज्ञात व्यक्तिहरूले आक्रमण गरेका थिए । उक्त घटनामा संलग्न रहेको आरोपमा प्रहरीले काभ्रेपलाञ्चोकका कोकिलबहादुर शाह, रामेछापको गेलु घर भएका ३१ वर्षीय सिर्जन अधिकारी र सर्लाहीका ३५ वर्षीय हेम तामाङलाई पक्राउ गरी अनुसन्धान गरेको थियो ।

अख्तियारले नलिन्चोक हेलिकप्टर काण्डसँग जोडिएको भ्रष्टाचारबारे विस्तृत अनुसन्धान जारी रहेको जनाएको छ ।