शिक्षा शाखाको ‘भ्रष्टाचार साम्राज्य’ भत्काउन आन्दोलन तीव्र, नरैनापुर बन्दको घोषणा

नितेशसिंह मौर्य/नरैनापुर। बाँकेको नरैनापुर गाउँपालिकामा शिक्षा क्षेत्रमा व्यापक अनियमितता, भ्रष्टाचार र लापरवाही भएको आरोपपछि स्थानीयवासी, विद्रोही समूह र सरोकारवाला आन्दोलित भएका छन्। 

उनीहरूले शिक्षा शाखामा ‘शैक्षिक माफियाको संगठित गिरोह’ सक्रिय रहेको दाबी गर्दै शिक्षा शाखा प्रमुख कृष्णकुमार थारुलाई गम्भीर भ्रष्टाचारको आरोपसहित तत्काल बर्खास्त गरी निष्पक्ष छानबिन गर्न माग गरेका छन्।

विद्यालयमा स्थानीय पाठ्यक्रम लागू नहुनु, दिवा खाजामा लाखौँ खर्च भएको देखाए पनि विद्यार्थीलाई चिउरा–नमकिन मात्र खुवाइने, वाटर प्युरीफायर जडान भएर पनि सञ्चालनमा नआएको, डेस्क–बेन्च र खानेपानी अभाव रहनु, तथा विद्युत् उपकरण विद्यालयमा नराखी शिक्षकको घरमा जडान गरिएको जस्ता गम्भीर अनियमितता उजागर भएका छन्।

एसईई नतिजा कमजोर हुनु, विषयगत शिक्षकको कमी, अनुगमन नहुनु र शिक्षक नियुक्तिमा लेनदेन हुने आरोपसमेत लगाइएको छ। आन्दोलनकारीले शिक्षा शाखा मौन बसेको र गाउँपालिका अध्यक्ष स्तियाक अहमद शाहले पनि कुनै कदम नचालेको आरोप लगाइएको छ। बुधबारको चक्काजाम र धर्नापछि भोलि नरैनापुर बन्दको घोषणा गरिएको आन्दोलनका संयोजक विनय दिक्षितले बताए ।

दिक्षितले नरैनाबासीहरुलाई शिक्षा क्षेत्रमा भएको भ्रष्टाचारको विरोधमा आयोजना गरिएको भोलिको नरैनापुर बन्द पूर्ण रुपले सफल पार्न  आह्वान गरेका छन।