नक्कली नक्सा बनाएर बैंकबाट लाखौं ऋण, गाउँपालिका उपाध्यक्षसहित ४ जनाविरुद्ध मुद्दा दायर

काठमाडौँ । कञ्चनपुरको बेलडाँडी गाउँपालिकाका उपाध्यक्ष शान्ति नाथसहित ४ जनाविरुद्ध नक्कली घरको नक्सा बनाएर बैंक ऋण लिएको आरोपमा अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।

आयोगले उपाध्यक्ष नाथसँगै तत्कालीन प्रमुख प्रशासकीय अधिकृत पदमराज जोशी, सब–इन्जिनियर जय कुँवर र असिस्टेन्ट सब–इन्जिनियर तेजबहादुर सुनारविरुद्ध बिहीबार विशेष अदालत काठमाडौँमा आरोपपत्र दायर गरेको हो।

आयोगका अनुसार उनीहरूले एक आपसमा मिलेमतो गरी घर नै नभएको जग्गामा पक्की भवन रहेको भन्दै झुटा कागजात बनाएर घर नक्सा पास तथा अभिलेखीकरण गराएका थिए। सोही आधारमा उपाध्यक्ष नाथले लक्ष्मी सनराइज बैंकबाट करिब ३३ लाख ७५ हजार रुपैयाँ ऋण लिएको खुलेको छ।

अनुसन्धानका क्रममा आयोगको टोलीले स्थलगत निरीक्षण गर्दा कञ्चनपुर, बेलडाँडी–२ स्थित कित्ता नम्बर ३५७ मा कुनैपनि पक्की संरचना नभएको प्रमाणित भएको मुचुल्कामा उल्लेख छ। नापी कार्यालय बेलौरीको फिल्ड प्रतिवेदनमा पनि सो जग्गामा घर नभएको पुष्टि भएको आयोगले जनाएको छ।

आरोपपत्रमा प्रतिवादीहरूले जग्गामा नभएको भवन भएको झुट्टा विवरण बनाइ नक्सा पास गराउने, घर प्रमाणित गराउने तथा गलत कागजात तयार पारेर भ्रष्टाचारजन्य कार्य गरेको ठहर गरिएको उल्लेख छ। आयोगले उनीहरूमाथि कानुनबमोजिमको सजाय माग गर्दै मुद्दा दायर गरेको हो।