घुससहित यातायातका अधिकृत र बिचौलिया अख्तियारको नियन्त्रणमा

काठमाडौं । अख्तियार दुरुपयोग अनुसन्धान आयोगले यातायात अधिकृतसहित दुई जनालाई घुस रकमसहित पक्राउ गरेको छ।

हेटौँडास्थित यातायात व्यवस्था कार्यालयमा कार्यरत छैटौँ तहका अधिकृत अमृत भेटुवाल र बिचौलियाका रूपमा कार्यरत लेखापढी व्यवसायी खगेन्द्र पौडेललाई आयोगको टोलीले रङ्गेहात नियन्त्रणमा लिएको हो।

सवारी साधन सरुवा सहमतिको काम गरिदिने बहानामा सेवाग्राहीसँग घुस माग गरिएको भन्ने विशेष सूचनाका आधारमा अख्तियार दुरुपयोग अनुसन्धान आयोगको कार्यालय हेटौँडा बाट खटिएको टोलीले निगरानी बढाएको थियो। सोही क्रममा पौडेलले सेवाग्राहीबाट ११ हजार ५ सय रुपैयाँ घुस लिइसकेको अवस्थामा हेटौँडा उपमहानगरपालिका वडा नं। ११ स्थित कार्यालय परिसरबाटै दुवै जनालाई पक्राउ गरिएको जनाइएको छ।

पक्राउ परेकाहरूको साथबाट तीन थान मोबाइल सेटसमेत बरामद गरिएको आयोगले जनाएको छ। सेवाग्राहीको काम छिटो गरिदिने भन्दै रकम लेनदेन भइरहेको उजुरीपछि केही समयदेखि उनीहरूमाथि निगरानी राखिएको थियो।

घटनाबारे जानकारी दिँदै आयोगका प्रवक्ता सुरेश न्यौपानेले पक्राउ परेका दुवै जनालाई हिरासतमा राखी थप अनुसन्धान प्रक्रिया अगाडि बढाइएको बताए।