नगरपालिकामा घुस प्रकरण: नगर प्रमुखसहित दुईविरुद्ध भ्रष्टाचार मुद्दा दायर

काठमाडौं । रूकुम पश्चिमस्थित चौरजहारी नगरपालिकामा घुस लिएको आरोपमा नगर प्रमुख र एक कर्मचारीविरुद्ध विशेष अदालतमा आरोपपत्र दायर गरिएको छ।

अख्तियार दुरुपयोग अनुसन्धान आयोगले गरेको अनुसन्धानअनुसार, नगरपालिकामा असिस्टेन्ट सब-इन्जिनियर पदमा करार सेवामा कार्यरत मोहन शाहले आफ्नो सेवा अवधि थप तथा नवीकरण गराउन नगर प्रमुख पुष्प वादीलाई घुस दिएको खुलासा भएको हो।

आरोपअनुसार, आर्थिक वर्ष २०८१/०८२ मा करार अवधि थप गर्न नगर प्रमुखले मोहन शाहसँग एक लाख रुपैयाँ मागेका थिए। उक्त रकम नगर प्रमुखको बैंक खातामा जम्मा गरेपछि मात्रै उनको करार म्याद थप गरिएको अनुसन्धानबाट देखिएको छ।

त्यसैगरी, आर्थिक वर्ष २०८२/०८३ का लागि पुनः करार नवीकरण गर्न पनि एक लाख रुपैयाँ मागिएको तर नगद उपलब्ध गराउन नसक्दा शाहको करार अवधि नथपिएको बताइएको छ। शाहले यसअघि जम्मा गरेको रकमको बैंक भौचर समेत प्रमाणका रूपमा पेश गरेका छन्।

अनुसन्धानले नगर प्रमुख पुष्प वादीले आफ्नो पदको दुरुपयोग गर्दै सेवामा निरन्तरता दिलाउने बहानामा घुस लिएको पुष्टि गरेको जनाएको छ। त्यस्तै, मोहन शाहले पनि आफ्नो पद जोगाउन घुस दिएको ठहर गरिएको छ।

उक्त कार्य भ्रष्टाचार निवारण ऐन, २०५९ अन्तर्गत कसुर ठहर गर्दै दुवै जनालाई एक-एक लाख रुपैयाँ बिगो कायम गरी कैद र जरिवानाको मागदाबी गरिएको छ। साथै, घुसस्वरूप लिएको रकम जफत गर्न समेत माग गरिएको छ।

आयोगले दुवै प्रतिवादीविरुद्ध आज विशेष अदालतमा आरोपपत्र दायर गरेको जनाएको छ।