८५ हजार रुपैयाँ घुससहित तीन कर्मचारी अख्तियारको नियन्त्रणमा

काठमाडौं । अख्तियार दुरुपयोग अनुसन्धान आयोगले घुस प्रकरणमा संलग्न तीन जना कर्मचारीलाई नियन्त्रणमा लिएको छ।

पक्राउ पर्नेहरूमा सघन शहरी तथा भवन निर्माण आयोजना, धनकुटामा कार्यरत इन्जिनियर सुमन राई, लेखा अधिकृत ईन्द्र बहादुर कार्की र सब–इन्जिनियर रविन श्रेष्ठ रहेका छन्। आयोगका अनुसार उनीहरूलाई घुस लिइसकेको अवस्थामा विभिन्न स्थानबाट नियन्त्रणमा लिइएको हो।

अख्तियारका अनुसार भोजपुरको टेम्केमैयुङ गाउँपालिका–५ स्थित पशुपति माध्यमिक विद्यालयको भवन निर्माणसँग सम्बन्धित अन्तिम भुक्तानी प्रक्रिया अघि बढाउन सेवाग्राहीसँग रकम मागिएको थियो। विभिन्न बहानामा हैरानी दिएपछि उनीहरूले ८५ हजार रुपैयाँ लिएको अवस्थामा अख्तियारको टोलीले उनीहरूलाई समातेको हो।

टंगालस्थित आयोगको कार्यालयबाट खटिएको टोलीले सुमन राईलाई ललितपुरबाट पक्राउ गरेको हो भने इटहरी कार्यालयको टोलीले कार्की र श्रेष्ठलाई क्रमशः धनकुटा र भोजपुरबाट नियन्त्रणमा लिएको बताइएको छ।

अख्तियारका सहायक प्रवक्ता गणेश बहादुर अधिकारीका अनुसार पक्राउ परेकाहरूबाट घुस रकम, तीन थान मोबाइल र सम्बन्धित कागजात समेत बरामद गरिएको छ। उनीहरुविरुद्ध थप अनुसन्धान अगाडि बढाइएको अख्तियारले जनाएको छ।