विद्युत प्राधिकरणका कार्यालय प्रमुख इन्जिनियर महेन्द्र १ लाख ४० हजार घुससहित पक्राउ

काठमाडौं । अख्तियार दुरुपयोग अनुसन्धान आयोगले विद्युत प्राधिकरणका प्रमुखलाई १ लाख ४० हजार रुपैयाँ घुस रकमसहित पक्राउ गरेको छ।

अख्तियारका अनुसार पक्राउ पर्नेमा सप्तरीस्थित नेपाल विद्युत् प्राधिकरण, कञ्चनपुर वितरण केन्द्रका प्रमुख इन्जिनियर महेन्द्र कुमार दास रहेका छन् ।

सेवाग्राहीसँग चार्जिङ्ग स्टेशन सञ्चालनका लागि ट्रान्सफर्मर जडान गरी लाइन छाडिदिने बहानामा १ लाख ४० हजार रुपैयाँ घुस लिइसकेको अवस्थामा महेन्द्रलाई पक्राउ गरेको अख्तियार दुरुपयोग अनुसन्धान आयोगले जनाएको छ।

अख्तियारको इटहरीस्थित टोलीले सप्तरीको हनुमाननगर कंकालिनी नगरपालिका- १ बाट महेन्द्रलाई उक्त रकमसहित नियन्त्रणमा लिएको हो।

घुससहित पक्राउ परेका महेन्द्रसँग अनुसन्धान सुरु गरिएको अख्तियार दुरुपयोग अनुसन्धान आयोगले जनाएको छ।