विपद् : मोहना नदीमा खतराको संकेत,सतर्क रहन आग्रह

धनगढी । कैलालीस्थित मोहना नदी किनार आसपास क्षेत्रमा बसोबास गर्ने स्थानीयलाई सतर्क रहन आग्रह गरिएको छ।  मोहना नदीमा बाढी बढ्ने क्रममा रहेकाले नदी किनार क्षेत्रका बासिन्दालाई आज बेलुकासम्मै सतर्क रहन स्थानीय प्रशासनले अनुरोध गरेको हो।

जल तथा मौसम विज्ञान विभागले पनि त्यहाँको जोखिम क्षेत्रका बासिन्दालाई एसएमएस पठाउँदै सतर्कता अपनाउन आग्रह गरेको जनाएको छ।

अहिलेसम्म मोहना नदीको जलमापन केन्द्रमा बाढीको सतह सतर्कता तह नाघेको छ । बाढी बढ्दो क्रममा रहेकाले सतर्क रहन भनिएको जिल्ला प्रशासन कार्यालय कैलालीले जानकारी दिएको छ।

प्रशासन कार्यालयका अनुसार आज बिहान साढे ७ बजेसम्म मोहना नदीमा पानीको सतह ३.०६ मिटर पुगेको छ । ३ मिटरसम्म पुगेमा सतर्कताको तह र ३.६० मिटर पुगेमा खतराको तहमा पुगेको मानिन्छ । स्थानीय प्रशासनले मोहना नदीले खतराको संकेत गरिसकेको हुँदा सुरक्षित

स्थानमा बस्न आग्रह गरेको छ भने हुन सक्ने खतराको लागि सुरक्षा फौज तयारी अवस्थामा बसिसकेको बताइएको छ।