कश्मीरमा आफ्नै राइफलबाट गोली पड्किँदा २४ वर्षीय सैनिक जवानको मृत्यु

काठमाडौं । भारतको उत्तरी कश्मीरमा आफैले प्रयोग गरेको राइफलबाट अचानक गोली पड्किएर एक जना सैनिक जवानको मृत्यु भएको छ।

कश्मीरको हन्दवाडा क्षेत्रमा रहेको सैनिक शिविरमा ड्युटीमा खटिएका २४ वर्षीय जवान जयदीपको आफ्नै सेवा राइफलबाट अचानक गोली पड्किँदा गम्भीर घाइते भएका थिए। घटनापछि उनलाई तत्काल जीएमसी हन्दवाडामा उपचारका लागि लगिएको थियो।

अवस्था गम्भीर बनेपछि उनलाई थप उपचारका लागि ९२ बेस अस्पताल बदामीबाग क्यान्टोनमेन्टमा रेफर गरिएको थियो। तर उपचारकै क्रममा उनको मृत्यु भएको अधिकारीहरूले जानकारी दिएका छन्।

घटना कसरी भयो भन्ने विषयमा विस्तृत अनुसन्धान सुरु गरिएको छ। प्रारम्भिक विवरण अनुसार राइफलबाट अचानक गोली पड्किएको बताइएको छ, तर वास्तविक कारण खुल्न बाँकी रहेको छ।

सम्बन्धित निकायले घटनाको सत्य तथ्य पत्ता लगाउन थप अनुसन्धान अघि बढाइएको जनाएको छ।