लेफ्टिनेन्ट जनरल धीरज सेठ सेनाको नयाँ प्रमुख नियुक्त

काठमाडौं  । भारत सरकारले लेफ्टिनेन्ट जनरल धीरज सेठलाई भारतीय सेनाको नयाँ प्रमुख (चीफ अफ आर्मी स्टाफ) नियुक्त गरेको छ। हाल सेना उपप्रमुखको जिम्मेवारी सम्हालिरहेका सेठले वर्तमान सेना प्रमुख जनरल उपेन्द्र द्विवेदीको स्थान लिनेछन्।

हालका जनरल द्विवेदीको कार्यकाल यही जुन महिनाको अन्त्यसम्म रहनेछ। उनले सन् २०२४ जुन ३० मा सेना प्रमुखको पदभार ग्रहण गरेका थिए। भारतीय सेनामा सेना प्रमुखको कार्यकाल तीन वर्ष वा ६२ वर्ष उमेरसम्म, जुन पहिले हुन्छ, त्यहीसम्म रहने व्यवस्था छ।

सन् १९८६ डिसेम्बरमा आर्मर्ड कोर्प्सको प्रतिष्ठित दोस्रो ल्यान्सर्स (गार्डनर्स हर्स) रेजिमेन्टबाट सैन्य सेवामा प्रवेश गरेका सेठसँग करिब चार दशक लामो सैन्य अनुभव छ। उनले मरुभूमि क्षेत्र, स्ट्राइक फर्मेसन तथा जम्मू–कश्मीरमा सञ्चालन गरिएका विद्रोहविरोधी अभियानहरूमा नेतृत्वदायी भूमिका निर्वाह गरेका छन्।

सैन्य जीवनमा उनले दक्षिणी कमाण्ड, दक्षिण–पश्चिमी कमाण्ड, २१ स्ट्राइक कोर्प्स र दिल्ली क्षेत्रलगायतका महत्वपूर्ण संरचनाको नेतृत्व गरिसकेका छन् भने विभिन्न पुरस्कार प्राप्त गरेका छन् ।