भारतीय सेना प्रमुख धिरज सेठ नेपाल आउँदै

काठमाडौं । भारतीय सेना प्रमुख जनरल धिरज सेठ औपचारिक भ्रमणका लागि नेपाल आउने भएका छन्। स्थल सेनाध्यक्ष जनरल धिरज आगामी साउन ३१ गते पाँचदिने  भ्रमणमा नेपाल आउन लागेका हुन् ।

नेपाली सेनाका प्रधानसेनापति अशोकराज सिग्देलको निमन्त्रणामा हुने यस भ्रमणका क्रममा उनलाई नेपाली सेनाको मानार्थ महारथी उपाधि प्रदान गरिनेछ।

नेपाल र भारतबीच विगत करिब सात दशकदेखि एकअर्काका स्थल सेनाध्यक्षलाई मानार्थ सेनापतिको उपाधि प्रदान गर्ने परम्परा रहँदै आएको छ। सोही परम्पराअनुसार राष्ट्रपति रामचन्द्र पौडेलले विशेष समारोहबीच जनरल धिरज सेठलाई नेपाली सेनाको मानार्थ महारथीको दर्ज्यानी चिह्न प्रदान गर्ने कार्यक्रम रहेको छ।

भ्रमणका क्रममा भारतीय सेना प्रमुखले प्रधानमन्त्री बालेन्द्र शाहसँग पनि शिष्टाचार भेट गर्ने अपेक्षा गरिएको छ। यसका लागि प्रधानमन्त्री तथा मन्त्रिपरिषद्को कार्यालयमा अनुरोध पठाइएको भए पनि भेटघाटको कार्यक्रम भने औपचारिक रूपमा पुष्टि हुन बाँकी रहेको बताइएको छ।

दुवै देशमा नयाँ स्थल सेनाध्यक्ष नियुक्त भएपछि एकअर्काको देशको भ्रमण गर्ने र त्यसक्रममा मानार्थ महारथीको उपाधि प्रदान गर्ने परम्परा रहँदै आएको छ। भ्रमण औपचारिक रूपमा पुष्टि भएपछि विस्तृत कार्यक्रम सार्वजनिक गरिने बताइएको छ।

जनरल सेठ गत जुन ३० मा भारतीय स्थल सेनाको ३१औँ प्रमुखका रूपमा नियुक्त भएका हुन्। उनी चैत १४ गते बालेन्द्र शाह नेतृत्वको सरकार गठन भएपछि नेपाल भ्रमण गर्ने पहिलो उच्च भारतीय अधिकारी हुनेछन्। यसअघि नेपाली सेनाका प्रधानसेनापति जनरल अशोकराज सिग्देललाई सन् २०२४ को डिसेम्बरमा भारतकी राष्ट्रपति द्रौपदी मुर्मुले भारतीय सेनाको मानार्थ जनरलको उपाधि प्रदान गरेकी थिइन्।