कोलम्बियामा शक्तिशाली भूकम्प, १३२ जनाको मृत्यु, ५७० घाइते

काठमाडौं । कोलम्बियाको पश्चिमी क्षेत्रमा सोमबार गएको शक्तिशाली ७.४ म्याग्निच्युडको भूकम्पमा परी कम्तीमा १३२ जनाको मृत्यु भएको छ भने ५७० जना घाइते भएका छन्। कोलम्बियन एसोसिएसन अफ क्यापिटल सिटिजका अनुसार भूकम्पका कारण ठूलो मानवीय क्षति हुनुका साथै देशका विभिन्न क्षेत्रमा हजारौँ भवनमा क्षति पुगेको छ।

अमेरिकी भूगर्भ सर्वेक्षण (यूएसजीएस) का अनुसार यो भूकम्प कम्तीमा सन् १९९० यताकै कोलम्बियामा उत्पत्ति भएको सबैभन्दा शक्तिशाली भूकम्प हो। भूकम्पको केन्द्रविन्दु राजधानी बोगोटाबाट करिब २४० किलोमिटर पश्चिममा रहेको उत्तरपश्चिमी क्षेत्र चोकोको सान होसे डेल पाल्मारमा रहेको थियो।

शक्तिशाली धक्काका कारण राजधानी बोगोटासहित देशका विभिन्न क्षेत्रमा कम्पन महसुस गरिएको थियो। भूकम्पको प्रभाव छिमेकी भेनेजुएलासम्म पनि परेको जनाइएको छ। भेनेजुएला यसअघि गएको शक्तिशाली भूकम्पको प्रभावबाट समेत प्रभावित भइरहेका बेला पुनः भूकम्पको धक्का महसुस गरिएको हो।

भूकम्पपछि प्रभावित क्षेत्रमा उद्धार तथा राहत कार्यलाई तीव्र पारिएको छ। क्षतिको पूर्ण विवरण संकलन गर्ने तथा भग्नावशेषमा फसेकाहरूको खोजी र उद्धार गर्ने काम भइरहेको अधिकारीहरूले जनाएका छन्। मृतक र घाइतेको संख्या अझै बढ्न सक्ने अनुमान गरिएको छ।