नेपालगन्जमा १ सय १७ जनालाई खोज तथा उद्धार तालिम, विपद् पूर्वतयारीमा जोड

नेपालगन्ज । नेपालगन्ज उपमहानगरपालिकामा संचालित शहरी विपद् तथा भूकम्पीय जोखिम पूर्व तयारी परियोजना (सुपर) को आयोजनामा खोज तथा उद्दार तालिम नेपालगन्जमा सम्पन्न भएको छ । दुई दिने तालिम चार चरणमा संचालन भएको थियो ।

उक्त तालिममा आगलागी, बाढी तथा डुबान र भूकम्पपछिको आधारभूत खोज तथा उद्दार विधि, विपद्का शब्दावली, प्राथमिक उपचार, खोज तथा उद्दारमा प्रयोग हुने उद्दार सामग्रीको प्रयोग र प्रदर्शन गरी व्यवहारिक अभ्यासको माध्यमबाट सिकाइएको थियो ।

तालिमको समापन कार्यक्रममा नेपालगन्ज उपमहानगरपालिकाका प्रमुख प्रशान्त विष्टले विपद् हुनासाथ सबभन्दा पहिला समुदाय नै उद्दारकर्मी हुने भएकोले नगरभित्र स्वयंसेवक तयार गरी विपद् भएको बेला तत्काल परिचालन गरिने बताए । नेपालगंज उपमहानगरपालिका वडा नं. ६ का वडा अध्यक्ष एवं नेपालगन्ज उपमहानगरपालिकाका विपद् समिति संयोजक समीर प्रताप सिंहको अध्यक्षतामा सम्पन्न कार्यक्रममा सहभागीको तर्फबाट मीरा अधिकारीले तालिम उपलब्धिमूलक भएको बताइन् ।

नेपालगंज उपमहानगरपालिका सबै वडाबाट प्रतिनिधिमूलक ५९ महिला र ५८ पुरुष गरी जम्मा ११७ जनालाई तालिम प्रदान गरिएको छ। युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपाल र रेडक्रसको प्राविधिक सहयोगमा नेपालगञ्ज उपमहानगरपालिकामा सञ्चालित सुपर कार्यक्रमको सहयोगमा तालिम संचालन भएको थियो ।

तालिमको सहजकर्ताहरुमा सशस्त्र प्रहरी बल नेपाल नं. ३० गण हेक्वाटर बागेश्वरी नेपालगन्जका सशस्त्र प्रहरी नायब उपरीक्षक नवीन बुढाथोकी सहितको टिम, नेपालगन्ज उपमहानगरपालिकाका विपद् फोकल पर्सन दिपेन्द्र श्रेष्ठ, नेपाल रेडक्रस सोसाइटी बाँकेका कार्यक्रम अधिकृत प्रहलाद विश्वकर्मा लगायतले प्रशिक्षण दिएका थिए भने कार्यक्रमको व्यवस्थापन तथा संचालन सुपर परियोजनाका कार्यक्रम संयोजक रुपन ज्ञवालीले गरेका थिए ।