एउटै होटेलमा मृत भेटिए ११ भारतीय नागरिक

काठमाडौं । एघार जना भारतीय नागरिक एउटै होटेलमा मृत फेला परेका छन् ।जर्जियाको गुदौरीको एक होटेलमा एघार भारतीय मृत भेटिएको अन्तर्राष्ट्रिय समाचार माध्यमले जनाएका छन् ।

भारतीय सन्चार माध्यम टाइम्स अफ इन्डियाले आफ्ना एघार नागरिक मृत फेला परेपछि भारतीय राजदूतावासले जानकारी जुटाएर घटनाको तथ्य पत्ता लगाउन जर्जिया प्रहरीलाई पत्राचार गरेको छ।

टाइम्स अफ इन्डियाले जनाएअनुसार ती भारतीय नागरिकसहित अर्का एक स्थानीय नागरिक जर्जियास्थित एक स्की रिसोर्टको दोस्रो तलामा मृत फेला परेका हुन् ।

उनीहरुको शव फेला परेपनि उनीहरू शरीरमा भने कुनै चोटपटक नदेखिएको हुँदा निसास्सिएर मृत्यु भएको हुन सक्ने बताइएको छ।

गत शुक्रवार राति अचानक बत्ती जाँदा त्यस होटेलमा डिजेलबाट चल्ने जेनेरेटर प्रयोग गरिएको जर्जिया प्रहरीले जनाएको अन्तर्राष्ट्रिय समाचार माध्यमले उल्लेख गरेका छन।