भारत-पाकिस्तानबीच तत्कालका लागि युद्दविराम

काठमाडौँ । अमेरिकी राष्ट्रपति डोनाल्ड ट्रम्पले तत्कालका लागि भारत र पाकिस्तान युद्धविरामका लागि तयार रहेको बताएका छन् ।

ट्रम्पले सामाजिक सञ्जाल एक्समा ‘राति अमेरिकाको मध्यस्थतामा चलेको लामो छलफलपछि मलाई यो बताउँदा खुशी लागेको छ कि भारत र पाकिस्तान तुरुन्त र पूर्ण तरिकाले युद्धविरामका लागि तयार भएका छन् । दुवै देशले समझदारीपूर्वक फैसला लिएकामा बधाई दिन्छु ।’

यता भारतीय सरकारले भविष्यमा भारतमा कुनै आतंकवादी आक्रमण भएमा त्यसलाई युद्धको कार्य मानिने बताएको छ । आक्रमणको जवाफ पनि त्यसैगरी दिइने समाचार एजेन्सी एएनआईले सरकारी स्रोतहरूलाई उद्धृत गर्दै यो समाचार दिएको हो ।

युद्धको कार्यबारे रणनीति विश्लेषक तथा ओआरएफका वरिष्ठ फेलो सुशान्त सरीनले भने, ‘अहिलेसम्म भारतमा कुनै पनि घटना हुँदा कूटनीतिक च्यानल सक्रिय हुन्थ्यो। अब सरकारको नयाँ नीतिको अर्थ भारतमा भएको कुनै पनि आतंकवादी हमला वा घटनामा पाकिस्तानको अलिकति पनि भूमिका भएमा सैन्य कारबाही गरिनेछ । आक्रमण पनि गर्न सकिन्छ ।’