हेलिकप्टर दुर्घटनामा ५ जनाको मृत्यु, २ जना घाइते

काठमाडौँ। दागेस्तान क्षेत्रमा  हेलिकप्टर दुर्घटना हुँदा ५ जनाको मृत्यु भएको छ भने अन्य २ जना घाइते भएका छन्।

रूसको दक्षिणी क्षेत्रीय स्वास्थ्य मन्त्रालयले दिएको जानकारी अनुसार, दुर्घटनास्थलमै ४ जनाको मृत्यु भएको थियो र अस्पतालमा भर्ना गरिएका तीन जना घाइतेमध्ये १ जनाको उपचारको क्रममा मृत्यु भएको हो। दागेस्तान गणराज्यका प्रथम उप-स्वास्थ्यमन्त्री नबी कुरायेभले घाइतेहरूलाई रिपब्लिकन क्लिनिकल अस्पतालमा भेटेका थिए, जसमध्ये एक जनाको अवस्था गम्भीर रहेको र अर्काको अवस्था मध्यम रहेको बताइएको छ।

दागेस्तान गणराज्यका प्रमुख सर्गेई मेलिकोभले हेलिकप्टरमा सात जना सवार रहेको पुष्टि गरेका छन्।

सम्बन्धित अधिकारीहरूले दुर्घटनाको कारणको अनुसन्धान गरिरहेको उल्लेख गरेका छन्। अधिकारीहरूले दिएको रिपोर्ट अनुसार, का–२२६ हेलिकप्टर ठोक्किँदा आगलागी भएको थियो र पूर्ण रूपमा ध्वस्त भएको थियो। क्षेत्रीय आपतकालीन सेवाहरूले उडानको इन्जिनमा आगो लागेको कारणलाई दुर्घटनाको प्राथमिक कारण मानेका छन्। 

दागेस्तानका लागि रूसी आपतकालीन मन्त्रालयको मुख्य निर्देशनालयले जारी गरेको विज्ञप्तिमा किज्ल्यारबाट इज्बरबाश जाँदै गरेको निजी हेलिकप्टर बसोबास नभएको घरमा ठोक्किएको उल्लेख गरिएको छ।