शान्ति सेना बसेको युएन भवनमा आक्रमण,६ जना शान्ति सेनाको मृत्यु

काठमाडौँ। शान्ति सेना बसेको संयुक्त राष्ट्र संघ (यूएन) को सुविधा केन्द्रमा ड्रोन आक्रमण हुँदा ६ जना संयुक्त राष्ट्र संघका शान्ति सैनिकको मृत्यु भएको छ भने ७ जना घाइते भएका छन्। घटना सुडानको दक्षिण कोर्डोफान राज्यको राजधानी कादुग्लीमा शनिबार भएको हो।

सुडानी अधिकारीहरूका अनुसार ड्रोनले संयुक्त राष्ट्र संघको मुख्यालय र बंगलादेश बटालियनलाई लक्षित गर्दै तीनवटा मिसाइल प्रहार गरेको थियो। आक्रमणका कारण संयुक्त राष्ट्र संघको भण्डारण केन्द्रमा आगलागी समेत भएको छ। मृत्यु भएका र घाइते भएका सबै शान्ति सैनिक बंगलादेश बटालियनका सदस्य रहेका छन्।

उक्त बंगलादेश बटालियन सुडान र दक्षिण सुडानबीचको विवादित क्षेत्र अबेईमा तैनाथ संयुक्त राष्ट्र संघको अन्तरिम सुरक्षा बल अन्तर्गत खटाइएको थियो।सुडानी सशस्त्र बलले आक्रमणको जिम्मेवारी अर्धसैनिक ¥यापिड सपोर्ट फोर्स (आरएसएफ) लाई दिएको छ। यद्यपि आरएसएफले भने उक्त आरोप अस्वीकार गरेको छ। सुडानको संक्रमणकालीन सार्वभौम परिषद्ले घटनाको कडा निन्दा गर्दै यसलाई अन्तर्राष्ट्रिय मानवीय कानुन तथा संयुक्त राष्ट्र संघका सुविधा केन्द्रहरूको सुरक्षामाथिको गम्भीर उल्लङ्घन भएको जनाएको छ।

सुडान अप्रिल १५, २०२३ देखि सुडानी सशस्त्र बल र ¥यापिड सपोर्ट फोर्सबीचको घातक द्वन्द्वमा फस्दै आएको छ, जसका कारण हजारौँको ज्यान गएको छ भने लाखौँ नागरिक विस्थापित भएका छन्।