जेलबाट भागेपछि पनि छोडिनन् अपराध, अन्ततः लागुऔषध र लाखौं रुपैयाँसहित पक्राउ

काठमाडौं । लागुऔषध मुद्दामा जेल सजाय भोगिरहेकी अवस्थामा फरार भएकी एक महिला पुनः लाखौं रुपैयाँ र लागुऔषधसहित पक्राउ परेकी छन्।

कास्की प्रहरीले पोखरा–२९ स्थित सैनिक बस्तीबाट २६ वर्षीया सिमा दर्जीलाई नियन्त्रणमा लिएको हो। जिल्ला प्रहरी कार्यालय कास्की र इलाका प्रहरी कार्यालय शिशुवाबाट खटिएको टोलीले उनलाई पक्राउ गरेको जनाएको छ।

प्रहरीका अनुसार दर्जीको साथबाट डाइजापाम, फेनेरागन र ब्रुफिनुर्फिन गरी ८ एम्पुल लागुऔषध, दुई थान मोबाइल र ४ लाख १ हजार रुपैयाँ नगद बरामद भएको छ।

पक्राउ परेकी दर्जी यसअघि पनि लागुऔषध मुद्दामै दोषी ठहर भई कास्की कारागारमा सजाय काटिरहेकी थिइन्। तर गत भदौ २४ गते ‘जेनजी आन्दोलन’का क्रममा उनी कारागारबाट फरार भएकी थिइन्।

फरार भएपछि पुनः लागुऔषध कारोबारमा सक्रिय रहेको अवस्थामा उनी पक्राउ परेकी हुन्। हाल कास्की जिल्ला अदालतबाट ६ दिनको म्याद थप गरी उनीमाथि थप अनुसन्धान भइरहेको प्रहरीले जनाएको छ।