महाकालीमा बेपत्ता सशस्त्रका असई थारूको शव झोलुङ्गे पुलको तारमा फसेको अवस्थामा फेला

कञ्चनपुर । महाकाली नदीमा बेपत्ता भएका सशस्त्र प्रहरीका सहायक निरीक्षक (असई) सागरराज थारूको शव भत्किएको झोलुङ्गे पुलको तारमा फसेको अवस्थामा फेला परेको छ। नदीमा पानीको बहाव अत्यधिक भएकाले शव बाहिर निकाल्न उद्धारकर्मीलाई समस्या भइरहेको छ।

कञ्चनपुरका प्रमुख जिल्ला अधिकारी मदन कोइरालाले शव रहेको ठाउँ पत्ता लागिसकेको जानकारी दिएका छन्। उनका अनुसार पुलको तारमा सशस्त्र प्रहरीको टी–सर्ट लगाएको व्यक्ति अड्किएको देखिएको छ।

शव निकाल्न गोताखोर र नेपाली सेनाको टोली खटिएको छ। बहाव नियन्त्रणमा लिनुपर्ने अवस्था आएमा जेसीबी प्रयोग गर्ने विकल्पमा समेत तयारी भइरहेको प्रशासनले जनाएको छ।

दोधाराचाँदनीलाई जोड्ने झोलुङ्गे पुल करिब दुई साताअघि भत्किएको थियो। पुलसँगै नेपाल टेलिकमको इन्टरनेट तार पनि चुँडिएपछि त्यसलाई तान्ने काम भइरहेको थियो। सोही क्रममा डुंगा नियन्त्रणबाहिर गएपछि थारू नदीमा बेपत्ता भएका थिए।

बर्दियाको ठाकुरबाबा नगरपालिका–६ तुलसीपुर घर भएका थारू घटनाभन्दा एक दिनअघि मात्रै दोधाराचाँदनीस्थित देवस्थान सीमा सुरक्षा गुल्ममा कार्यरत हुन पुगेका थिए।

तीव्र बहावका कारण उद्धारमा कठिनाइ भइरहेकाले उनको शव निकाल्ने प्रयास जारी छ।