भारतीय स्थल सेनाध्यक्ष द्विवेदी आज नेपाल आउँदै

काठमाडौं । नेपाली सेनाको निमन्त्रणामा भारतीय स्थल सेनाध्यक्ष उपेन्द्र द्विवेदी आज नेपाल आउन लागेका छन् ।

राष्ट्रपति रामचन्द्र पौडेलबाट नेपाली सेनाको मानार्थ महारथीको दर्जा ग्रहण गर्न स्थल सेनाध्यक्ष द्विवेदी आज काठमाडौं आउँदै छन् ।

राष्ट्रपति पौडेलले उनलाई भोलि मानार्थ महारथीको दर्जा प्रदान कार्यक्रम रहेको छ। मंसिर ९ गतेसम्म नेपालमै रहने द्विवेदीले राष्ट्रपतिसहित, प्रधानमन्त्री, रक्षामन्त्री  र नेपाली सेनाका प्रधानसेनापतिसँग औपचारिक भेटघाट गर्ने कार्यक्रम रहेको नेपाली सेनाले जनाएको  छ।

१ नोभेम्बर २०२४ मा २९ औं  भारतीय स्थल सेनाध्यक्षको जिम्मेवारी सम्हालेका द्विवेदीले आज सेनाका विभिन्न कार्यालयहरुको निरीक्षण गर्ने छन् । त्यस्तै उनले सेनाको पश्चिम पृतना मुख्यालयको समेत निरीक्षण गर्ने कार्यतालिका रहेको नेपाली सेनाले जनाएको छ।