एसपी चन्दको सरुवासँगै काठमाडौं प्रहरी परिसरमा अबदेखि दुई जना एसपी

काठमाडौं । प्रहरी प्रधान कार्यालयले जिल्ला प्रहरी परिसर काठमाडौंमा अबदेखि दुईजना प्रहरी उपरीक्षक (एसपी)  रहने व्यवस्था गरेको छ।

यसअघि जिल्ला प्रहरी परिसरमा एक जना मात्रै एसपी रहने व्यवस्था भएपनि सोमबारदेखि प्रहरी प्रधान कार्यालयले पहिलो नम्बरमा बढुवा भएका एसपी कुलदिप चन्दको पदस्थापन गर्दै त्यहा पठाएको हो। चन्द जानुअघि परिसरमा एक्ला एसपी अपीलराज बोहरा मात्रै थिए।

परिसरमा कामको निकै चाप हुने हुँदा सोमबार एसपीमा बढुवा भएका चन्दलाई पठाएर प्रहरी प्रधान कार्यालय जिल्ला प्रहरी परिसरमा दुई एसपी रहने व्यवस्था गरेको प्रहरी प्रवक्ता दिनेश कुमार आचार्यले बताए।

एसपी चन्द प्रहरी संगठनमै अब्बल र उत्कृष्ट कार्य गरिसकेका अधिकृत भएको हुँदा चन्दलाई जिल्ला प्रहरी परिसर काठमाडौंमा पठाइएको प्रहरी प्रधान कार्यालयले जानकारी दिएको छ।

पहिलादेखि नै परिसरमा दुई जना एसपी राख्ने कुरा अगाडि बढेपनि कार्यान्वयन हुन सकेको थिएन। काठमाडौं प्रहरी परिसरको कमाण्ड वरिष्ठ प्रहरी उपरीक्षक (एसएसपी) ले सम्हाल्ने व्यवस्था रहेको छ।