ठमेलमा प्रहरी कुट्ने अखिलका नेता जोशीलाई किन उन्मुक्ति?

काठमाडौं । काठमाडौंको मुख्य पर्यटकीय क्षेत्र ठमेलमा दुई जना प्रहरीमाथि कुटपिट गर्ने केहिलाई पक्राउ गरेर नेकपा एमालेको विद्यार्थी संगठन अनेरास्ववियू (अखिल) का नेता कमलराज जोशीलाई ‘उन्मुक्ति’ दिएपछि प्रश्न चिन्ह खडा भएको छ । यही घटनामा संलग्न अन्य पाँच जनाविरुद्ध भने पक्राउ पुर्जी जारी गरिएको छ ।

अखिलका स्थायी कमिटी सदस्य रहेका जोशी सहितको समूहले गत बिहीबार ड्युटीमा खटिएका प्रहरीलाई कुटपिट गरेको थियो । घटनामा संलग्न रहेको आरोपमा पाँच जनाविरुद्ध पक्राउ पुर्जी जारी हुँदा जोशीलाई किन ‘उन्मुक्ति’ दिइयो भन्ने प्रश्न उठेको छ ।

माघ २४ मा मध्यराति ‘राउण्ड अप ड्युटी’मा खटिएका प्रहरीलाई नेकपा (एमाले) निकट अनेरास्ववियुका स्थायी समिति सदस्य कमल जोशीसहितको समूहले कुटपिट गरेका हुन् ।

आइतबार मात्रै प्रहरीमाथि आक्रमण गरेको आरोपमा ताप्लेजुङको फुङलिङ नगरपालिका–१ घर भएका २६ वर्षीय दिनेश सिग्देल र डडेल्धुराको गन्यापधुरा गाउँपालिका–५ का २२ वर्षीय रमेश फुलारा पक्राउ परेका थिए । अमृत साइन्स क्याम्पस (अस्कल)मा अध्ययनरत दुवै जना नेकपा एमालेको विद्यार्थी संगठनमा आबद्ध छन् ।

अनेरास्ववियुको अस्कल क्याम्पस कमिटी सचिव गोपालबहादुर शाही, क्याम्पस कमिटी सदस्य नवीन ऐर र सौजन्य शाहीलाई प्रहरीले फरार सूचीमा राखेको छ । तर, अनेरास्ववियुका स्थायी समिति सदस्य जोशीलाई प्रहरीले अनुसन्धानको दायरामा नै ल्याएको छैन ।  

पक्राउ परेका दुवै जनाविरुद्ध जिल्ला प्रशासन कार्यालय काठमाडौंबाट अभद्र व्यवहारको कसुरमा पाँच दिनको म्याद लिएर अनुसन्धान अघि बढाइएको प्रहरीले जानकारी दिएको छ। तर, अनेरास्ववियुका स्थायी समिति सदस्य कमल जोशीलाई प्रहरीले अनुसन्धानको दायरामा नै ल्याएको छैन ।  

माथिल्लो तहबाट दबाब आएपछि प्रहरीले जोशीविरुद्ध पक्राउ पुर्जीका लागि प्रशासनसँग अनुमति समेत नमागेको प्रहरी स्रोत बताउँछ । ‘मुख्यगरी, जोशीकै आडमा प्रहरीमाथि आक्रमण भएको देखिन्छ । तर, माथिल्लो तहबाट प्रेसर आएकै कारण उनलाई उन्मुक्ति दिएर बाँकी पाँच जना विरुद्ध मात्रै पक्राउ पुर्जी जारी भएको छ,’ परिसरका एक अधिकृतले बताए।

प्रहरी जवान नगेन्द्रराज विष्ट र हवल्दार जुगलाल घर्तीलाई जोशी नेतृत्वको टिमले आक्रमण गरेको भए पनि उनलाई अनुसन्धानको दायरामा नल्याइएको प्रहरी अधिकारीहरू बताउँछन् । प्रहरीहरु नै भन्छन्, ‘सिपाहीमाथि आक्रमण गर्नेहरूलाई विभागले नै जोगाएको छ ।’ तर जिल्ला प्रहरी परिसर जोशी घटनामा सामेल नभएको भन्दै आएको छ।

आक्रमणबाट प्रहरीको बर्दी च्यातिनुका साथै हेल्मेट समेत फुकालेर प्रहरीलाई हिर्काइएको थियो । हाल उन्मुक्ति दिइएका जोशीले समेत प्रहरीलाई औंलो ठड्याउँदै चेतावनी दिएको भिडिओमा प्रष्ट देखिन्छ ।

माघ २ मा राष्ट्रिय स्वतन्त्र पार्टीका सभापतिको बिरुद्धमा बहस गरेको भन्दै वरिष्ठ अधिवक्ता दिनेश त्रिपाठीलाई आक्रमण गर्नेहरू विरुद्ध ज्यान मार्ने उद्योग मुद्दा चलेको थियो । तर, सुरक्षा ड्युटीमा खटिएकाहरूलाई प्रधानमन्त्रीका नाम लिएर निर्घात कुट्दा सामान्य मुद्दामा घटना डिसमिस पार्न खोजिएको छ । यो कस्तो न्याय हो?

अस्कल क्याम्पसमा यसअघि सभापतिमा चुनाव लडेका जोशी विवादित पृष्ठभूमिका व्यक्ति हुन् । उनीविरुद्ध प्रहरी वृत्त सोह्रखुट्टेमा दुईवटा मुद्दा विचाराधीन रहेको भेटिएको छ ।

रमेश फुलारा र दिनेश सिग्देललाई ५ दिन हिरासतमा राखेर अनुसन्धान गर्न जिल्ला प्रशासन कार्यालय काठमाडौँले अनुमति दिएको छ । आरोपीहरूले दुईजना प्रहरीले आफूहरूमाथि मुख छाडेपछि आक्रमण गरेको जिकिर गरेका छन् । तर, जवान र हवल्दारले चाहिँ सडकमा हल्ला गरेपछि सम्झाउँदा उल्टै आफूहरूमाथि आक्रमण गरेको बताएका छन् । हवल्दार घर्तीको टाउको र छातीमा चोट लागेको छ । जवान विष्टको आँखामा चोट लागेको छ ।