प्रहरी प्रतिष्ठानको ६९ औं वार्षिकोत्सव, उत्कृष्टलाई छात्रवृत्ति तथा पुरस्कार वितरणसम्म

काठमाडौं । राष्ट्रिय प्रहरी प्रशिक्षण प्रतिष्ठानको ६९औं वार्षिकोत्सवको अवसरमा विभिन्न कार्यक्रम गरिएको छ।

प्रतिष्ठानको ६९औँ वार्षिकोत्सवमा कार्यालय परिसरमै आयोजित कार्यक्रममा प्रतिष्ठानका कार्यकारी निर्देशक प्रहरी अतिरिक्त महानिरीक्षक (एआईजी)  सुदिप गिरीले सम्पुर्ण प्रहरी कर्मचारी एवम् प्रहरी परिवारबीच आपसी भाईचारा सद्भाव एवं समभावको पाठशालाको रुपमा रहेको यस ऐतिहासिक स्थलसँग भौतिक रुपमा मात्र नभई भावनात्मक संवेदनले पनि उत्तिकै नजिक र आत्मिय रहनुपर्ने धारणा व्यक्त गरेका थिए।

साथै कार्यकारी निर्देशक गिरीले राष्ट्रिय प्रहरी प्रशिक्षण प्रतिष्ठानको ६९औँ वार्षिकोत्सवको अवसरमा कार्यक्रमहरुलाई भव्यताका साथ सम्पन्न गर्नमा क्रियाशिल हुने साथै सद्भाव राख्ने सम्पुर्ण प्रहरी कर्मचारी, शुभेच्छुकहरु प्रति हार्दिक धन्यवाद व्यक्त गरेका थिए।

कार्यक्रममा विभिन्न खेलकुद प्रतियोगिताका विजेता- उपविजेता खेलाडी र अफिसियललाई ट्रफी, मेडल तथा प्रमाणपत्र वितरण गर्नुका साथै  प्रतिष्ठानमा व्यवसायिक रहेर सांगठनिक निति-निर्देशनको पालना गर्दै उत्कृष्ट ढंगले कार्यसम्पादन गर्ने प्रहरी कर्मचारीहरुलाई अभिलेखमा राखिने गरी एआईजी गिरीले प्रमाणपत्र सहित नगद पुरस्कार प्रदान गरेका थिए।

वार्षिकोत्सवका अवसरमा प्रतिष्ठानलाई विभिन्न समयमा विशेष सहयोग पुर्याएको नेपाल विधुत प्राधिकरण वितरण केन्द्र प्रमुख, केल्मी नेपाल प्रा.लि.का प्रबन्ध निर्देशक र विश्वव्यापी रुपमा फैलिएको डेंगु नियन्त्रणमा सहयोग पुर्‍याउनु हुने रमेश केसीलाई एआईजी गिरीले प्रशंसा पत्रद्वारा सम्मान गरेका थिए।

त्यस्तै प्रहरी कर्मचारीहरुका लागि कल्याणकारी कार्यक्रम अन्तर्गत प्रतिष्ठानमा कार्यरत प्रहरी कार्यालय सहयोगीदेखि जुनियर प्रहरी अधिकृत दर्जासम्मका सन्तानहरु मध्ये उत्कृष्ट ४ जना जेहेन्दार बालबालिकाहरुलाई प्रतिष्ठान परिवार नारी विकास प्रशिक्षण केन्द्रकी अध्यक्ष कल्पना गिरीले छात्रवृत्ति प्रदान गरेको राष्ट्रिय प्रहरी प्रशिक्षण प्रतिष्ठानले जनाएको छ।

एआईजी गिरीले खेलकुद जगतले शारीरिक र मानसिक रुपमा स्वस्थ रहन मद्दत गर्नुका साथै स्वस्थ प्रतिस्पर्धा, उच्चतम तहको भातृत्त्व एवं सामूहिक भावनाको समेत विकास गर्ने र यिनै गुणहरूले व्यक्तिगत तथा प्रहरी कार्य सम्पादन र व्यवसायिक निपुणता प्राप्त गर्नमा समेत सहयोगी सिद्ध हुन्छन् भन्ने कुरामा संक्षिप्त निर्देशन समेत दिएका थिए।