प्रसंग 'द ब्लु पेभेलियन': एआईजी थापालाई दिइएको सम्मानले ल्याएको तरङ्ग

काठमाडौं । नेपाल प्रहरीका प्रहरी अतिरिक्त महानिरीक्षक (एआईजी) दीपक थापा प्रधानमन्त्री केपी शर्मा ओलीबाट विशेष योगदान दिएको भन्दै सम्मानित भएको विषयले यतिबेला निकै तरङ्गका साथ चर्चा पाएको छ।

माघ २६ गते शनिबार काठमाडौंको भृकुटीमण्डपस्थित नेपाल प्रहरीको 'द ब्लु पेभेलियन'को उद्घाटनका क्रममा एआईजी थापालाई निर्माण कार्यमा विशेष योगदान पुर्‍याएको भन्दै प्रहरी प्रधान कार्यालयको सिफारिसमा प्रधानमन्त्रीद्वारा सम्मानित गरिएको थियो।

नेपाल सरकारको सहयोगमा निर्माण हुने गरी  तत्कालीन प्रहरी महानिरीक्षक सर्वेन्द्र खनालले विसं २०७६ भदौ २४ गते शिलान्यास गरेको 'द ब्लु पेभेलियन' निर्माणमा प्रहरीको केन्द्रीय अनुसन्धान ब्यूरो (सीआईबी)  प्रमुख एआईजी थापालाई दिइएको सम्मानप्रती टिका-टीप्पणी उठ्दै गएको छ।

एआईजी थापामाथि पुरस्कार र सम्मान थुपारेर कति भावी प्रहरी प्रमुख बनाउने कार्य सुरु भएको त हैन भन्ने प्रहरी वृत्तमै निकै कानेखुसी सुरु भइसकेको छ । कतिपयले त यसो भन्छन् -"निर्माण कार्यमै अहम् भुमिका खेल्नेहरु अरु पनि थिए होलान् तर प्रहरी प्रधान कार्यालयले एआईजी थापालाई किन सम्मानको हकदार बनाइयो?"

यदि सम्मान दिनै पर्ने थियो भने तत्कालीन प्रहरी प्रमुख खनाललाई दिएको भयो हुन्थ्यो होला। उनकै पालामा 'द ब्लु पेभेलियन'शिलान्यास गरिएको थियो, हैन भने वर्तमान प्रहरी प्रमुख बसन्तबहादुर कुँवरलाई दिए पनि उचित देखिन्थ्यो ।यदि त्यो पनि सम्भव नभए कसैलाई नदिएको भएपनि हुन्थ्यो  तर कार्यक्षेत्र नै नभएको व्यक्तिलाई किन सम्मान दिइयो भन्ने विषयके यतिबेला चर्चा बटुलेको छ।

प्रहरी श्रोतका अनुसार एआईजी थापाको सम्मानको लागि प्रहरी प्रधान कार्यालयको सिफारिस नभई बाहिरबाट सिफारिस आएको बुझिएको छ। हाल 'द ब्लु पेभेलियन' सिधै प्रहरी प्रधान कार्यालयले निगरानी गर्दै आएको र नयाँ कार्यविधि बनाएर हेर्ने निकाय तोक्ने प्रहरी प्रवक्ता दिनेश आचार्यले बताए।

सहयोग सरकारको अनि निर्माण कार्यमा विशेष भुमिका पुर्‍याएको भन्दै प्रहरी प्रमुखले नै एआईजी थापालाई नै  सम्मान हुनलाई किन सिफारिस गरे भन्ने विषयले प्रहरीभित्रै गहन चर्चा पाएको छ।