४० लाख बढी हुन्डीको रकमसहित एक भारतीयसहित दुई जना पक्राउ

काठमाडौं । प्रहरीले एक भारतीय नागरिकसहित दुई जनालाई ४० लाख रुपैयाँ बराबरको हुन्डी रकमसहित पक्राउ गरेको छ। 

विशेष सूचनाका आधारमा गएको काठमाडौं प्रहरीको टोलीले ४० लाख साढे ३२ हजार रुपैयाँसहित भारतको कलकत्ता घर भएर हाल काठमाडौँ महानगरपालिका-२३ ओमबहाल बस्दै आएका ६७ वर्षीय सुरज दत्त र रुपन्देही  घर भएर हाल चन्द्रागिरि नगरपालिका-१५ तिनथाना बस्ने ६३ वर्षीय धर्म प्रसाद ढकाललाई पक्राउ गरेको जिल्ला प्रहरी परिसर काठमाडौंले जानकारी दिएको छ।

प्रहरी परिसर काठमाडौंका अनुसार मंगलबार साँझ प्रहरीले  उनीहरुलाई  काठमाडौँ महानगरपालिका-२४ विशाल बजारको भुईँ तलामा खानतलासी गर्ने क्रममा ४० लाख  साढे ३२ हजार रुपैयाँ बरामद गरेको थियो।

पक्राउ परेका उनीहरुको साथबाट प्रहरीले दुई थान मोबाइल र विभिन्न सहकारी संस्थाको हस्ताक्षर भएको खाली चेक पनि बरामद गरेको जिल्ला प्रहरी परिसर काठमाडौंले जानकारी दिएको छ।

काठमाडौं प्रहरीले उनीहरुविरुद्ध थप अनुसन्धान सुरु गरेको जानकारी दिएको छ।