भारतीय ट्रकमा लैजाँदै गरेको २ सय किलो गाँजासहित एक भारतीय र दुई नेपाली पक्राउ

काठमाडौं । प्रहरीले २ सय किलो गाँजासहित भारतीय नागरिकसहित ३ जनालाई पक्राउ गरेको छ।

चितवनको खैरहनी नगरपालिका-३ टुंगाराबाट उक्त २ किलो गाँजासहित भारतको बिहारस्थित मोतिहारी मधुवनका ४० वर्षीय बिरेश यादव, राप्ती नगरपालिका-२ बस्ने ४७ वर्षीय चन्द्रबहादुर तामाङ र २५ वर्षीय सुभाष तामाङलाई पक्राउ गरेको हो।

इलाका प्रहरी कार्यालय खैरहनी र प्रहरी चौकी चैनपुरबाट खटिएको प्रहरीले बिआर ०५ जिसि ९५१३ नम्बरको ट्रकलाई जाँच गर्ने क्रममा ट्रकको क्याबिनमा फल्स बटम बनाई लुकाईछिपाई राखेको उक्त परिमाणको गाँजा फेला पारी ट्रक चालक बिरेश तथा ट्रकमा सवार चन्द्रबहादुर र सुभाषलाई समेत पक्राउ गरेको प्रहरी प्रधान कार्यालयले जानकारी दिएको छ।

मंगलबार राति गाँजासहित पक्राउ तीनै जनालाई आज अदालतबाट म्याद थप गरेर थप अनुसन्धान गरिरहेको प्रहरी प्रधान कार्यालयले जनाएको छ।