एसपी भट्टराईद्वारा रामपुर प्रहरीको निरीक्षण, लागुऔषध कारोबारीविरुद्ध खरो भएर लाग्न निर्देशन

पाल्पा। पाल्पा प्रहरी प्रमुख एसपी पवन कुमार भट्टराईले इलाका प्रहरी कार्यालय रामपुरको निरीक्षण गर्दै समाजमा  शान्तिसुरक्षाको माहोल बनाइराख्न निर्देशन दिएका छन् ।

केही दिनअघि पाल्पा प्रहरीको कमान्ड सम्हालेका एसपी भट्टराईले आज रामपुर प्रहरी कार्यालयका प्रहरी कर्मचारीका व्यक्तिगत टर्नआउटकोसमेत निरीक्षण गरेको रामपुर प्रहरी प्रमुख इन्स्पेक्टर रामबहादुर नेपालीले जानकारी दिएका छन् ।

एसपी भट्टराईले रामपुर प्रहरी कार्यालयको  ब्यारेक, खाना बनाउने र  खाने मेस , क्यान्टिन तथा हिरासत कक्षको समेत निरीक्षण गरेका हुन् । उनले प्रहरी कार्यालयका विभिन्न शाखाको समेत निरीक्षण गरेको नेपालीले बताए।

निरीक्षणका क्रममा एसपी भट्टराईले सबैभन्दा पहिला कर्मचारीको चालचलन सहि हुनुपर्ने बताउँदै जिम्मेवारीलाई कर्तव्यनिष्ठ र इमानदारीपूर्वक निभाउन निर्देशन दिएका थिए। गलत कार्य जो सुकै भएपनि कानुनको दायरा ल्याउन पछि नहट्ने उनले बताए ।

अपराध नियन्त्रणतर्फ गम्भीर भएर लाग्न बताउँदै एसपी भट्टराईले समाजमा भयावह फैलाउने र समाजमा दुर्गन्ध बनाउने लागुऔषध कारोबारीविरुद्ध खरो रुपले उत्रनु रामपुर प्रहरी कार्यालयका सकल दर्जालाई निर्देशन दिएका हुन् ।

प्रहरीले सवारी दुर्घटना न्यूनीकरलाई प्राथमिकतामा राखेर जनमानसलाई सचेतना कक्षा दिनुपर्ने बताउँदै  भइरहेका त्रुटी र कमजोरीलाई सुधार गर्न समेत दिएका थिए।