ठुलो परिमाणको ब्राउन सुगरसहित सासू र बुहारी पक्राउ

काठमाडौं । प्रहरीले लागूऔषधसहित आफ्नै सासू र बुहारीलाई पक्राउ गरेको छ।

सुनसरीको इटहरी उपमहानगरपालिका–१७ पकलीबाट ठूलो परिमाणमा लागूऔषध ब्राउन सुगरसहित सासू र बुहारी पक्राउ परेका हुन्। इलाका प्रहरी कार्यालय पकलीबाट खटिएको प्रहरी टोलीले स्थानीय ७० वर्षीया सरातुन खातुन र उनकी २० वर्षीया बुहारी सेविका सरदारलाई पक्राउ गरेको हो।

जिल्ला प्रहरी कार्यालय सुनसरीका सूचना अधिकारी एवं प्रहरी नायब उपरीक्षक चन्द्रबहादुर खड्काका अनुसार सरातुनको घरमा लागूऔषधको कारोबार भइरहेको गोप्य सूचनाका आधारमा प्रहरीले छापा मारेको थियो।

घरमा गरिएको जाँच तथा खानतलासीका क्रममा सरातुनले बोकेको कपडाको झोलाभित्र लुकाएर राखिएको अवस्थामा २१.५० ग्राम ब्राउन सुगर बरामद गरिएको प्रहरीले जनाएको छ। बरामद लागूऔषधसहित दुवै जनालाई नियन्त्रणमा लिएर इलाका प्रहरी कार्यालय पकलीमा राखिएको छ। उनीहरूमाथि लागूऔषध सम्बन्धी कसुरमा थप अनुसन्धान तथा कानुनी कारबाहीको प्रक्रिया अघि बढाइएको सूचना अधिकारी खड्काले जानकारी दिए।

प्रहरीले लागूऔषध कारोबारमा संलग्न अन्य व्यक्तिको संलग्नता भएरनभएको विषयमा समेत अनुसन्धान जारी रहेको जनाएको छ।