नेपाल प्रहरीको कारबाहीमा लागुऔषधसहित १३ जना पक्राउ

काठमाडौं ।  नेपाल प्रहरीको कारबाहीमा देशका विभिन्न स्थानबाट अवैध तथा नियन्त्रित लागुऔषधसहित १३ जना पक्राउ परेका छन् ।

मकवानपुरको हेटौंडा उपमहानगरपालिका–११ थानाभर्‍याङबाट ट्रामाडोल ८ सय ४८ ट्याब्लेटसहित दुई जना पक्राउ परेका छन् । पक्राउ पर्नेमा चितवनको राप्ती नगरपालिका–१ निवासी ३२ वर्षीय गोबिन्द तामाङ र मकवानपुरको मनहरी गाउँपालिका–३ लामिटार निवासी २४ वर्षीय सफल बिक्रम राणा रहेका छन् । बागमती प्रदेश प्रहरी गण हेटौंडाबाट खटिएको प्रहरी टोलीले उनीहरूलाई पक्राउ गरेको हो ।

त्यसैगरी, ललितपुर महानगरपालिका–१८ वाइवाई चोकबाट ट्रामाडोल १ सय १८ ट्याब्लेटसहित दुई जना पक्राउ परेका छन् । पक्राउ पर्नेमा धादिङको निलकण्ठ नगरपालिका–५ घर भई हाल ललितपुरको चुनिखेल बस्ने २२ वर्षीय नविन आले मगरसमेत रहेका छन् । प्रहरी प्रभाग बुंगमतीबाट खटिएको टोलीले उनीहरूलाई पक्राउ गरेको हो ।

उदयपुरको बेलका नगरपालिका–८ कोठुबाट नाइट्राजेपाम ८० ट्याब्लेटसहित २१ वर्षीय सरोज बर्देवा पक्राउ परेका छन् । उनी बेलका नगरपालिका–४ प्रगति टोलका बासिन्दा हुन् । इलाका प्रहरी कार्यालय रामपुर ठोक्सिलाबाट खटिएको प्रहरीले उनलाई पक्राउ गरेको हो ।

कञ्चनपुरको बेलौरी नगरपालिका–१ फटैया खल्लाबाट १ ग्राम १ सय ८० मिलिग्राम ब्राउन सुगरसहित दुई जना पक्राउ परेका छन् । पक्राउ पर्नेमा पुनर्वास नगरपालिका–११ डोकेबजार निवासी ३० वर्षीय बिशाल विक र कैलालीको जोशीपुर गाउँपालिका–९ निवासी २२ वर्षीय कुशल चौधरी रहेका छन् । प्रहरी चौकी फटैयाबाट खटिएको टोलीले से.२ प ९६९५ नम्बरको मोटरसाइकलमा सवार उनीहरूलाई पक्राउ गरेको हो ।

झापाको मेचीनगर नगरपालिका–२ बाट ६ ग्राम ४ सय ५० मिलिग्राम खैरो हेरोइनसहित चार जना पक्राउ परेका छन् । पक्राउ पर्नेमा मेचीनगर नगरपालिका–८ निवासी ३९ वर्षीय मिलन मेचे पनि रहेका छन् । प्रहरी चौकी तिरिङखोलाबाट खटिएको टोलीले उनीहरूलाई पक्राउ गरेको हो ।

यसैगरी, सुनसरीको इटहरी उपमहानगरपालिका–१ हलगडा चोकबाट ट्रामाडोल २ सय ट्याब्लेट र डाइक्लोमाइन २ सय ट्याब्लेटसहित सुन्दरहरैँचा नगरपालिका–५ सिक्किमे चोक निवासी ३१ वर्षीय पर्शुराम गुरुङ पक्राउ परेका छन् । कोशी प्रदेश प्रहरी कार्यालय विराटनगरबाट खटिएको टोलीले उनलाई पक्राउ गरेको हो ।

इटहरी उपमहानगरपालिका–२ बरगाछीबाट पनि ट्रामाडोल ३० ट्याब्लेट र डाइक्लोमाइन ३० ट्याब्लेटसहित सोही ठाउँका २८ वर्षीय उज्ज्वल बुढाथोकी पक्राउ परेका छन् । प्रहरीले उनीहरूले प्रयोग गरेका प्रदेश १–०२–०५३ प ५१ नम्बर र बा.२३ प २४७३ नम्बरका मोटरसाइकलसमेत बरामद गरेको छ ।

पक्राउ परेकाहरूका सम्बन्धमा प्रहरीले थप आवश्यक अनुसन्धान गरिरहेको जनाएको छ ।