दुई राउण्ड गोलीसहित दुई युवक पक्राउ

काठमाडौं । सप्तरी प्रहरीले दुई राउण्ड गोलीसहित दुई युवकलाई नियन्त्रणमा लिएर अनुसन्धान सुरु गरेको छ।

प्रहरीका अनुसार बिहीबार अपराह्न करिब ४ बजे बलान बिहुल गाउँपालिका–३ अन्तर्गत टिकुलिया–बेल्ही सडकखण्डमा बाँसको मचानमा शंकास्पद अवस्थामा बसेका दुई जनामाथि खानतलासी गरिएको थियो। सो क्रममा ३२ वर्षीय सुभाष कुमार पासमानको साथबाट ‘८ एमएम’ लेखिएको दुई राउण्ड गोली बरामद भएको प्रहरीले जनाएको छ।

घटनामा बलान बिहुल गाउँपालिका–३ कै २२ वर्षीय धर्मेन्द्र सिंह पनि पक्राउ परेका छन्।

जिल्ला प्रहरी कार्यालय सप्तरीका प्रवक्ता तथा सूचना अधिकारी प्रहरी नायब उपरीक्षक हेमराज घिमिरेका अनुसार दुवै जनाविरुद्ध खरखजाना सम्बन्धी मुद्दा दर्ता गरी अदालतबाट पाँच दिनको म्याद लिएर थप अनुसन्धान भइरहेको छ।