बाँकेबाट १६ फरार प्रतिवादी पक्राउ, ७ वर्षभन्दा बढी कैद फैसला कार्यान्वयन

नेपालगञ्ज । जिल्ला प्रहरी कार्यालय बाँकेले फैसला कार्यान्वयनलाई प्रभावकारी बनाउने अभियानअन्तर्गत विभिन्न मुद्दामा अदालतबाट फैसला भई फरार रहेका १६ जना फरार प्रतिवादीलाई पक्राउ गरेको छ।

बाँके प्रहरीका अनुसार असार ११ गतेदेखि १५ गतेसम्म  जिल्ला प्रहरी बाँकेबाट खटिएको टोलीले ती फरार प्रतिवादीहरूलाई पक्राउ गरेको हो। पक्राउ परेका सबैलाई आवश्यक कानुनी कारबाहीका लागि सम्बन्धित निकायमा बुझाइएको जिल्ला प्रहरी कार्यालय बाँकेले जनाएको छ।

पक्राउ परेका १६ जना प्रतिवादीबाट ७ वर्ष १ महिना २४ दिन कैद सजाय तथा रु.६ लाख ७ हजार ८७६ जरिवाना असुलउपर हुने फैसला कार्यान्वयन भएको प्रहरीले जनाएको छ। जिल्ला प्रहरी कार्यालय बाँकेले फरार प्रतिवादी पक्राउ अभियानलाई आगामी दिनमा पनि निरन्तरता दिइने जनाएको छ।

नेपालगञ्जमा सार्वजनिक स्थानमा झैँ–झगडा गर्ने ११ जना पक्राउ, अनुसन्धान जारी

त्यसैगरि, नेपालगञ्ज उपमहानगरपालिका–१२ स्थित सञ्जीवनी कलेज अफ मेडिकल साइन्सेस प्रालिको मुख्य गेटअगाडि सार्वजनिक स्थानमा झैँ–झगडा गरी शान्ति सुरक्षा खल्बल्याएको आरोपमा भारतीय नागरिकसहित ११ जनालाई प्रहरीले पक्राउ गरेको छ।

जिल्ला प्रहरी कार्यालय बाँकेका अनुसार मिति २०८३ असार १४ गते सडकमा झैँ–झगडा गर्दै सार्वजनिक शान्तिमा खलल पु¥याउने तथा सर्वसाधारणमा डर, त्रास र आतंक फैलाउने गतिविधिमा संलग्न ११ जनालाई नियन्त्रणमा लिइएको हो।

पक्राउ परेकामाथि जिल्ला प्रशासन कार्यालय बाँकेबाट अभद्र व्यवहार सम्बन्धी कसुरमा ६ दिनको म्याद थप गरी थप अनुसन्धान भइरहेको बाँके प्रहरीले जनाएको छ।