आफूलाई एसपी भन्दै सर्वसाधारणलाई धम्क्याउने व्यक्ति पक्राउ

काठमाडौँ । आफूलाई प्रहरीको अपराध अनुसन्धान महाशाखाका एसपी भनेर चिनाउँदै सर्वसाधारणलाई धम्क्याउने एक व्यक्ति काठमाडौँबाट पक्राउ परेका छन्।

पक्राउ पर्नेमा नुवाकोटको बेलकोटगढी नगरपालिका–१२ घर भई हाल बुढानीलकण्ठ नगरपालिका–६ हात्तीगौँडामा बस्दै आएका ३८ वर्षीय राजकुमार आलेमगर रहेका छन्।

प्रहरीका अनुसार आलेमगरले आफू उच्च प्रहरी अधिकृत भएको परिचय दिँदै सर्वसाधारणलाई डर–त्रास देखाउने तथा दुःख दिने गरेको सूचनाका आधारमा प्रहरी टोली परिचालन गरिएको थियो। सोधपुछका क्रममा उनले प्रहरीसँग समेत विवाद गर्नुका साथै सार्वजनिक स्थलमा होहल्ला गर्दै अभद्र व्यवहार गरेको जनाइएको छ।

त्यसपछि उनलाई मंगलबार काठमाडौँ महानगरपालिका–२६ स्थित सिंहदरबार अगाडिको सडकबाट नियन्त्रणमा लिइएको प्रहरीले जनाएको छ।

जिल्ला प्रहरी परिसर काठमाडौँका प्रवक्ता प्रहरी उपरीक्षक पवनकुमार भट्टराईका अनुसार आलेमगरविरुद्ध आवश्यक कानुनी प्रक्रिया अघि बढाइएको छ। जिल्ला प्रशासन कार्यालय काठमाडौँबाट पाँच दिनको म्याद थप अनुमति लिएर घटनाबारे थप अनुसन्धान भइरहेको प्रहरीले जनाएको छ।