अख्तियारमा कार्यरत प्रहरी अधिकृतको सरुवाबारे भ्रम फैलिएको भन्दै नेपाल प्रहरीको ध्यानाकर्षण

काठमाडौँ । अख्तियार दुरुपयोग अनुसन्धान आयोगमा कार्यरत केही वरिष्ठ प्रहरी अधिकृतहरूको काज तथा सरुवालाई लिएर विभिन्न सञ्चारमाध्यम र सामाजिक सञ्जालमा प्रकाशित समाचारप्रति नेपाल प्रहरीले गम्भीर ध्यानाकर्षण भएको जनाएको छ।

नेपाल प्रहरी प्रधान कार्यालयले आज जारी गरेको प्रेस विज्ञप्तिमार्फत सम्बन्धित प्रहरी अधिकृतहरूको काज तथा सरुवा नियमित प्रशासनिक प्रक्रिया अन्तर्गत गरिएको स्पष्ट पारेको छ।

प्रहरी प्रधान कार्यालयका अनुसार मानवस्रोत विकास विभाग, कर्मचारी प्रशासन शाखाको २०८३ असार १८ र १९ गतेको निर्णयअनुसार उक्त सरुवा तथा काज गरिएको हो। यो प्रक्रिया कुनै विशेष अनुसन्धान, उजुरी, घटना वा अन्य विवादसँग सम्बन्धित नभई नियमित कर्मचारी व्यवस्थापनका क्रममा गरिएको नेपाल प्रहरीले जनाएको छ।

प्रहरीले तथ्य र आधिकारिक जानकारीबिना अनुमानका आधारमा समाचार प्रकाशन तथा टिप्पणी गर्दा आम नागरिकमा भ्रम फैलिन सक्ने र सार्वजनिक संस्थाप्रतिको विश्वासमा समेत असर पर्न सक्ने उल्लेख गरेको छ। साथै, यस्ता अपुष्ट तथा तथ्यहीन सामग्रीले नियमित प्रशासनिक प्रक्रियालाई अनावश्यक विवादमा तान्ने भएकाले जिम्मेवार ढंगले सूचना सम्प्रेषण गर्न सञ्चारमाध्यम, सामाजिक सञ्जाल प्रयोगकर्ता तथा सरोकारवालालाई आग्रह गरेको छ।

केन्द्रीय प्रहरी प्रवक्ता अबि नारायण काफ्लेद्वारा जारी विज्ञप्तिमा नेपाल प्रहरीले कानुनी व्यवस्था, पारदर्शिता, निष्पक्षता तथा स्थापित प्रशासनिक प्रणालीको पालना गर्दै आफ्नो जिम्मेवारी निर्वाह गर्न निरन्तर प्रतिबद्ध रहेको उल्लेख गरिएको छ।